Euskalmet – Euskal Meteorologia Agentziaren arabera, azaroa lehorra eta beroa izan da. Mende honetako hirugarren azaro beroena izan da 2006koaren eta 2011koaren atzetik. Horrela, kostaldean batez besteko tenperatura 14-15 ºC ingurukoa izan da, eta Arabako Lautadan, berriz, 10 ºC ingurukoa, 1991-2020 aldi normalaren batezbestekoaren gainetik 2.4 ºC.
Azaroaren 1etik 6ra bitartean izan ziren egunik beroenak, eta tenperatura maximoen batezbestekoa 20 ºC-tik gora egon zen. Zehazki, maximo absolutuak hilaren 5ean erregistratu ziren, 25 ºC baino altuagoak izan ziren kostaldeko eskualdeetan eta Enkarterriko leku askotan (Oleta 26.9 ºC, Jarralta 26.7, Oiartzun 26.3, Sodupe-Cadagua , Mungia 25.8 eta Lasarte 25.1).
Egunik hotzena hilaren 13a izan zen, eta batez besteko tenperatura 10 ºC-tik beherakoa izan zen kostaldean eta 5 ºC ingurukoa Arabako Lautadan. Ipar-ekialdeko adbekzio hotzaren ondorioz izotza egin zuen mendialdeetan. Hala ere, tenperatura minimo absolutuak hilaren 25etik aurrera erregistratu ziren, inbertsio termikoaren ondorioz. Zerua, egunez egun garbiago egon zenez, goizetan izotza egin zuen Arabako hainbat lekutan (Iturrieta -2.7 ºC, Subijana -1.4, Navarrete -1.3, Kanpezu -1.2, Antoñana -1 eta Salvatierra -0.5).
Tenperatura horiekin batera izan den intsolazioa batezbestekoa baino handiagoa izan da (eguzki-orduak % 10-30 gehiago izan dira). Hiriburuz hiriburu, Bilbok 155 eguzki-ordu izan ditu, Donostiak 132 eta Gasteizek 117.
Prezipitazioari dagokionez, zehaztu behar da ez dela homogeneoa izan, eta, beraz, kostaldean azaroa ohikoa izan den arren, Mediterraneo isurialdean oso lehorra izan dela. Mendeari dagokionez, azaro lehorrenetako bat izan da, baina ez 2007koa eta 2020koa bezainbestekoa. Hala ere, esan daiteke Arabako Errioxan bigarren azaro lehorrena izan dela 2007koaren ondoren. Berez, prezipitazio-egunen kopurua batez besteko klimatologikoa baino askoz txikiagoa izan da.
Euri kopuru handienak Gipuzkoa ipar-ekialdean pilatu dira (Eskas 192.1 l/m², Oiartzun 156.8, Behobia 145 eta Añarbe 137.4) eta Bizkaiko kostaldean (Derio 163.7 l/m², Muxika 139.9, Almike 136.6 eta Berriatua 135.9). Hegoalderantz egin ahala, balioak azkar jaisten dira, eta baxuenak Arabako hegoaldean erregistratu dira (Moreda 12.7 l/m², Kanpezu 19.5, Páganos 22.3 eta Espejo 24.6).
Era berean, nabarmentzekoa da haizearen intentsitatea, bereziki hilaren 24an, haize-bolada bortitzak izan baitziren haizegune askotan eta haizeguneak ez diren hainbat lekutan (Zizurkil 126 km/h). Hilaren 25ean haizea indarra galtzen joan zen, baina, hala ere, hileko bolada indartsuena egun horretako goizaldean erregistratu zen (Orduña 149,9 km/h).
Azaroan, Eusko Jaurlaritzak 2 alerta laranja aktibatu zituen, bat haizeagatik haizeguneetan eta bestea haizeagatik haizeguneak ez diren lekuetan, baita 16 abisu hori ere, 2 prezipitazio iraunkorragatik, 4 haizeagatik haizeguneetan, 3 haizeagatik haizeguneak ez diren lekuetan, 6 olatuen altueragatik nabigaziorako eta 1 baso-sute arriskuagatik.
