Eusko Jaurlaritzako Lurralde Plangintza eta Hiri Agendako sailburuorde Juan Carlos Abascalek, Soraluzeko alkate Unai Larreategirekin eta Udaleko zinegotzi Patricia Borinagarekin batera, Gipuzkoako udalerriko Ezozibidea auzoa osorik birgaitzeko proiektua bisitatu du gaur goizean. Proiektuak 8 milioi eurotik gorako inbertsioa du, eta horietatik 5,5 baino gehiago Etxebizitza eta Hiri Agenda Sailetik datoz. Lanak erritmo onean egiten ari dira aurrera, eta honako hauek uztartzen dituzte: etxebizitzak birgaitzea —72 guztira, 5 ataritan banatuta—, hobekuntzak irisgarritasunean eta energia-efizientzian, eta espazio publikoak eta kulturalak biziberritzea. Horrez gain, Opegenla (Kudeaketa eta Hurbiltasun Bulego Teknikoa) sortzea, kalea berriz urbanizatzea iragazte eta hezetasunen arazoak konpontzeko, eta kultura-espazio bat berreskuratzea herritarrek erabiltzeko espazio libre estali eta balioaniztun gisa.
Bisitan zehar, Abascalek proiektu honen garrantzia azpimarratu du, “administrazio publikoen eta herritarren arteko lankidetzaren adibide gisa, herritarren bizi-kalitatea hobetzeko”. Hain zuzen, horiek 1.286.372,65 euroko ekarpena egin dute. Era berean, sailburuordeak azaldu duenez, “proiektu honek indartu egiten du Sailak hiri-berroneratzearekin eta gizarte-kohesioarekin duen konpromisoa, Soraluzeko herritarrek auzo irisgarriagoa, jasangarriagoa eta biziz betea izan dezaten”. Eragiketa honetarako, Etxebizitza eta Hiri Agenda Sailak 5.635.598,54 euro bideratu ditu, Gipuzkoako Foru Aldundiak 1.041.926,00 euro eta Udalak 60.584,65 euro, orain arte.
Bestalde, Unai Larreategi Soraluzeko alkateak nabarmendu duenez, proiektu hau “administrazio publikoek bultzatutako asmo handiko politikek gizartea eraldatzeko duten ahalmenaren adibide argia da”. Gaineratu du “gure udalerria eraberritzeko” bultzada politiko erabakigarriak direla, eta hau esan du: “administrazioen artean lanean jarraituko dugu Soraluzeko beste auzo batzuetan haiek erreplikatu ahal izateko”.
Proiektuak lau ardatz nagusi ditu:
- Eraikinak birgaitzea:
- Irisgarritasuna hobetzea igogailuak instalatuta eta atariak egokituta. Igogailuei dagokienez, aurreikusita dago guneak eraikinen ibairako fatxadan zehar jartzea, gaineko solairuetan irteera izateko eta goiko solairuetan, atariko beheko solairuan eta sestra azpiko solairuetan plataforma berriak sortzeko. Igogailurako sarbidea atari-mailako sarrera berri batetik egingo da, eta beheko solairuko lokalaren zati bat okupatuko du. Igogailurako sarbidea atariaren aldameneko lonjetako batetik aurreikusten da.
- Eraikinen inguratzailean esku hartzea energia-efizientzia areagotzeko, fatxada aireztatuko sistemak, isolamendu termikoa eta arotzeria berritzea barne. Eraikinen inguratzailea termikoki isolatzeko, aurreikusita dago fatxadetarako fatxada aireztatuko sistema baten bidez isolamendua sartzea, eta estalkia eta sabaiak isolatzea. Era berean, kontuan hartutako inguratzailearen prestazioak hobetzeko, fatxadako irtengune guztiak, balkoiak eta garajeetako sabaiak termikoki isolatzea aurreikusten da. Estalkipea harri-ileko isolamendu termikoarekin isolatuko da. Inguratzaileko zubi termikoak ezabatzea planteatzen denez, beharrezkoa da higiezinaren terrazak edo balkoiak termikoki isolatzea, bai goialdetik, bai behealdetik. Horrek berekin dakar goialdean egungo balkoi eta terrazetako zoladura altxatzea eta isolamendu termikoko geruza bat sartzea; beraz, zoruaren altuera igo egingo da. Aurreikuspen horrekin, balkoi eta terrazetara irteteko ateen eta leihoen ordez arotzeria altuago bat jartzea pentsatu da. Halaber, eskailera-guneko arotzeria komuna ordeztea aurreikusten da.
- Berokuntza-sistemak ordeztea, energia primario berriztaezinaren kontsumoa % 60 murrizteko. Inguratzaile termikoa isolamenduarekin hobetzeaz, aipatutako arotzerien ordez lehen mailako energia berriztaezinaren kontsumoa murrizteaz eta jatorrizko egoera baino % 60 hobea lortzeaz gain, aurreikusita dago higiezinean dauden galdarak efizientzia handiagoko galdara berriekin ordeztea.
- Opengela (Kudeaketa eta Hurbiltasun Bulego Teknikoa):
- Bulego hau Kalebarren kaleko 8. zenbakian dago, eta zerbitzu integrala eskaintzen die bizilagunei, birgaitze-prozesu osoan laguntza administratiboa, teknikoa, juridikoa eta finantzarioa eskainita. Debegesak kudeatzen du eta 29,5 orduko jarduera presentziala du. 2023ko apiriletik dago abian, eta proiektua amaitu arte egongo da zabalik.
- Ingurunea berrurbanizatzea:
- Obren artean sartuta dago Ezozibidea kalea erabat berritzea, irisgarritasuna hobetzeko, iragazte-arazoak konpontzeko eta bidea berriro zolatzeko. Esku-hartze hauek 2025eko urtarrilean hastekoak dira, eta ingurune eskuragarriagoa eta funtzionalagoa izatea bermatuko dute.
- Kulturan eta paisaian esku hartzea:
- “Kanoiak” industriagune zaharra balio anitzeko eremu gisa herritarrentzat berreskuratzea, Soraluzeko hiri-paisaia biziberritzen eta haren memoria historikoa sendotzen lagunduta. Horretarako, “Sociedad Anómina Placencia de las Armas – SAPA” nabea finkatzea planteatzen da, udalerriaren hiri-, industria- eta gizarte-historiaren parte baita.
- SAPArako jarduketak Gipuzkoako Foru Aldundiaren finantzaketa ere jaso du. Lanak dagoeneko amaitu dira eta espazioa erabilera betean dago.
Laburbilduz, Ezozibidea auzoaren berroneratzea adibide garbia da lurralde-plangintzak nola eralda ditzakeen komunitateak eraldatzeko erakusteko, iragana eta etorkizuna herritar guztien onurarako lotuta.
Hutsik dagoen etxebizitza mobilizatzeko akordioa
Ostiral honetako bisitaren aurretik, Etxebizitzako sailburuorde eta Alokabideko lehendakariorde Miguel de los Toyosek eta Soraluzeko alkate Unai Larreategik akordio bat sinatu dute Euskadin hutsik edo jenderik gabe dauden etxebizitzak mobilizatzeko, gure biztanleriako sektore sozial garrantzitsu batzuek etxebizitza duin eta egoki batez gozatzeko duten eskubidea gauzatu ahal izan dezaten. Esku-hartze horren barruan daude Bizigune programa eta ASAPa (Alokairu Segurua, Arrazoizko Prezioa). Lehenengoa Alokabidek kudeatzen du, eta bigarrena agente kolaboratzaileen sare baten bidez jarri da abian, eta horien artean dago Alokabide.
