Foru Gobernuak Nafarroa Markaren Mahaia sortzea erabaki du, lurraldearen etorkizunari buruzko hausnarketa kolektiboa bultzatzeko eta ezarritako helburuen betetze-mailaren jarraipena egiteko sortutako zeharkako partaidetzarako organoa. Gobernuak Parlamentuko talde politiko bakoitzeko ordezkari bana gonbidatuko du foro horretan parte hartzera, baita une jakin batzuetan aholkularitza espezializatua lortzeko beharrezkoak izan daitezkeen profesional adituak ere.
Nafarroa Markaren Mahaia izen bereko proiektua indartzeko helburuarekin sortu da, lurraldearen lehiakortasuna areagotu eta Foru Komunitate eta Europako eskualde gisa duen posizionamendua bultzatzearren. Organo hau sortzeko Gobernu-akordioan adierazi bezala, “Mahai honen helburu nagusia da informazioa, analisia, hausnarketa eta proposatzeko gaitasuna lantzea, Nafarroa Marka gure autogobernua hobetzeko etorkizuneko tresna moduan hartuta, proiekzio instituzional eta zibikotik”.
Felix Taberna lehen lehendakariorde eta Lehendakaritzako eta Berdintasuneko kontseilariak nabarmendu du Mahai hau sortuta “adostasun eta iraunkortasun handiagoa lortu” nahi direla Nafarroa Marka berriak dituen helburuen inguruan.
Mahaia Lehendakaritzako eta Berdintasuneko Departamentuari lotuta egongo da, Foru Komunitatearen irudi instituzionala babesteko, garatzeko eta sustatzeko ardura duen arloa izanik. Exekutiboaren aldetik, organo horretan parte hartuko dute Nafarroako Gobernuko Lehendakariak, lehendakariordeek, Nafarroako proiekzio instituzionalaz arduratzen den Departamentuko kontseilariak eta arlo horretako zuzendari nagusiak. Organoa osatzeko, Parlamentuan ordezkaritza duen talde politiko bakoitzak bere borondatez izendatuko ditu pertsonak.
Nafarroa Marka proiektuaren analisi, jarraipen eta hobekuntzako funtzioak
Mahaiari esleitutako funtzioen artean aipatzekoak dira Nafarroa Marka proiektua aztertzea eta horren inguruan hausnartzea, gauzatzeari eta ebaluatzeari buruzko informazioa jasotzea, proiektua bultzatzea eta jarduketa- edo hobekuntza-proposamenak egitea. Organoa urtean hirutan bilduko da, modu arruntean.
Modu horretan, Nafarroa munduan birkokatzeko eta eskualde berritzaile, berdintasunezko eta iraunkor moduan garatzeko beste aurrerapen bat egiten ari da Foru Gobernuaren estrategia berria.
‘Gauzak egiteko dugun modua’ lelopean, Nafarroa Markaklurraldeko garapen sozio-ekonomikoaren alde lan egiten duten eragile guztien lankidetzarako eta proiekziorako gunea izan nahi du. 2024. urtean zehar, proiektua hainbat forotan aurkeztu dute, Foru Komunitatearen barruan nahiz Estatuan eta Europan, Nafarroan eta Nafarroatik kanpo goi-mailako preskriptoreak erakartzeko helburuarekin, talentua, inbertsioak eta aukera berriak erakartzen lagun dezaten. Lurralde-marka gisa dituen indarguneen artean, honako hauek nabarmentzen dira proiektuan: Nafarroako industria eta nekazaritzako elikagaien sektorearen potentziala, puntako hezkuntza-sistema, sistema biomediko aurreratua, berrikuntza-plataforma, aberastasun naturala, sustrai kultural sakonak eta bizi-kalitate handia.
