Barakaldoko Udalak gaur ireki du herriko langabeen kontratazio mugagaberako dirulaguntzak eskatzeko epea. Kontraprestazio horiek 2023ko ekainaren 1etik 2024ko maiatzaren 31ra bitartekoak izan behar dute, bi data horiek barne. Eskabidea Inguralderen bidez egin beharko da, otsailaren 28ko 14:00ak baino lehen.
«Iaz 26 laguntza eman genituen, 213.162,14 eurokoak, eta horrek agerian uzten du programa honen tamaina», ziurtatu du David Sollak, Inguraldeko presidenteak. Laguntza horien lehen deialditik, 2013an, Barakaldok 392 laguntza eman ditu, 2.519.427,25 €-ko zenbatekoarekin.
Deialdi honetarako aurreikusitako gehieneko zenbatekoa 282.535,76 eurokoa da, Udalaren aurrekontu-partidaren kargura. Ildo horretan, Sollak gogorarazi du Barakaldoko Udalak ematen dituela dirulaguntzak, Inguralderen bitartez, Lanbide-Euskal Enplegu Zerbitzuaren 2024ko ekitaldirako enplegua sustatzeko tokiko ekintzetarako laguntzen deialdiaren esparruan.
Zehazki, laguntzak Barakaldoko enpresa eta erakundeei zuzenduta daude, baldin eta udalerrian lanik gabe eta erroldatuta dauden pertsonak kontratatu badituzte eta kontratuaren unean Lanbiden enplegu-eskatzaile gisa izena emanda eta alta emanda badaude. Kontratazio horiek mugagabeak izan behar dute – lanaldiaren % 50 gutxienez –, eta 2023ko ekainaren 1etik (aurreko deialdia amaitzearekin bat) 2024ko maiatzaren 31ra bitartean egin behar dira.
Laguntzak emateko, ezinbestekoa da, halaber, kontratazioek enplegua sortzea, batez besteko plantilla osoaren gainean. Kasu honetan kontuan hartu beharreko epea langile berria sartu aurreko 6 hilabeteak dira..
Laguntza urtean 8.000 eurokoa izango da lanaldi osoko lan-kontratu bakoitzeko. Lanaldi partzialeko kontratuen kasuan, dirulaguntza lan egindako lanaldiarekiko proportzionala izango da, eta azken zenbatekoak ezin izango du kontratatutako pertsonaren urteko soldata-kostuen % 75 gainditu.
Diru-sarrerak bermatzeko errentaren jasotzaileak, titularrak edo onuradunak, 35 urtetik beherakoak, iraupen luzeko langabeak edo 55 urtetik gorakoak kontratatzen badira, zenbatekoa kostuen % 100 izango da, urtean 10.000 €gehienez ere. Zenbateko horiek % 10 igoko dira kontratatutako pertsona emakumea bada.
Iazko deialdian bezala, oraingoan ere laguntza zehatzak aurreikusi dira artisten eta ikuskizun publikoetako teknikarien eta laguntzaileen kontratuetarako, sektorearen beharrizanak eta egoera berezia kontuan hartuta. Kasu horretan, kontratuen gutxieneko iraupena 3 hilabetekoa izango da, eta gutxienez lanaldi erdikoa.
Interesa duten enpresek udalaren webgunearen egoitza elektronikoaren bidez eskatu behar dituzte laguntzak. Halaber, informazio gehiago edo zalantzak argitu daitezke Inguraldeko Enplegu Sailean, 944 789 355 telefonoan edo empleo@inguralde.eus helbide elektronikoan. Arreta ordutegia 09:00etatik 14:00etara da.
Inguraldek gogorarazi du, bestalde, lan-kontratuak lehen hamabi hilabeteetan azkentzeak emandako dirulaguntza itzultzea ekarriko duela.
