Ikerketak sustatzea ezagutzaren mugan, nerbio-sistemako gaixotasunetarako soluzioak bilatuz, gaixotasun neurodegeneratiboetan eta bizitza luzatzeak planteatzen dizkigun erronketan oinarrituta, eta pazienteei aplikatzeko prozesua bizkortzeko helburuarekin. Horixe da Eusko Jaurlaritzako Osasun Sailaren eta Osakidetzaren Osasun Ikerketarako Institutuaren laborategi berriaren —Biobizkaia BBK brainlab— helburu nagusia. BBK-k sustatutako laborategi hau, Osasuneko sailburu Alberto Martínez eta Xabier Sagredo BBK-ko presidentea buru izan dituen ekitaldi batean aurkeztu da gaur, eta bertan parte hartu dute Pazienteen Erakundeen Plataformako (POP) zuzendari Pedro Carrascalek eta AEA gaixotasuna duen eta DaleCandELA-ren sortzaile den Jaime Lafitak.
Osasuneko sailburuak nabarmendu du, hain zuzen ere, laborategi hau antzeko patologiak —Alboko Esklerosi Amiotrofikoa (AEA). Parkinson gaixotasuna (PD), Esklerosi Anizkoitza edo Alzheimer gaixotasuna bezalako dementziak— dituzten pazienteen ekimenera ateak irekita sortu dela, terapia aurreratuetan eta doitasunezko medikuntzan oinarrituta, eta haien benetako beharretan oinarritutako ikerketa-jarduera batera bideratuta, bertan lortutako emaitzak praktika klinikora azkar eramatea bilatuz. «Laborategi hau pazienteen ekimenetara irekitzeko kontzepzio berri batekin sortu da. Herritarren benetako beharretan oinarritutako zientzia», adierazi du sailburuak.
« Beste mota bateko lan-eredu bat, pentsaezina indarrak batu eta sinergiak sortu eta sendotu ditugun eragile guztien parte-hartzerik gabe«, Alberto Martinezen hitzetan; sailburuak, Pazienteen Erakundeen Plataformaren eta, proiektuaren behin betiko bultzatzaile gisa, DalecandELAren zeregina nabarmendu ditu, baita BBK banku-fundazioaren —Institutuaren sozietate eta laborategiaren funtsezko sustatzailea— eta Occident Fundazioaren rola ere, zeina ere ilusioz beteriko proiektu horri lotu baitzaio.
Martínez sailburuak nabarmendu duenez, Biobizkaia Osasun Ikerketako Institutua (bertako zuzendari zientifikoa, Mar Mendibe neurologoa, buru du) gaur egun erreferentea da Estatuan eta nazioartean; 400 ikerketa-proiektutan parte hartzen du, gaixotasun neurodegeneratiboetan 120 saiakuntza kliniko baino gehiago eginez, eta 1.700 profesional baino gehiago atxikita ditu. Profesional horiek asistentzia eta ikerketa klinikoa uztartzen dituzte Osakidetzan. Euskadik dituen gainerako Osasun Ikerketako Institutuetan —Biogipuzkoa, Bioaraba eta Biosistemak— bezala.
Era berean, adierazi du Osasun Saila jada lanean ari dela lankidetza-sareetan sartzeko ikertzaile sanitarioak sustatzeko plan bat prestatzen, eragileen artean ezagutzaren transferentzia hori sustatzeko.
Osasuneko sailburua ziur agertu da, giza kapital eta kapital profesional horrekin, Biobizkaia BBK brainlab nazioarteko erreferente izateko bidean dagoela esanez. «Talentuaren traktore gisa, gaixotasun neurodegeneratiboetarako soluzioen sortzaile gisa eta, batez ere, itxaropen-eramaile gisa, bere lanaren bikaintasunak osasun handiagoa eta bizi-kalitate hobea ekarriko baitie patologia mota horiek pairatzen dituzten pertsonei eta haien familiei».
BBK-k 10. urteurrena ospatzen du aurten banku-fundazio bihurtu zenetik, eta 2017an sozietate-erakunde instituzional gisa sartu zen Biobizkaian, ikerketa zientifikoaren, herritarren eta lurraldearen garapenaren arteko lotura indartzeko. Uste dutelako kultura zientifikoa sustatzea funtsezko zeregina dela, ez bakarrik Biobizkaiarentzat, baita gure gizartearen ongizatearekin eta aurrerabidearekin konprometituta dauden BBK bezalako erakundeentzat ere.
Azkenik, azpimarratu behar da Pedro Carrascalek, POPeko zuzendari nagusiak, urte asko daramatzala Biobizkaiarekin lankidetzan, Plataformatik eta Institutuko Ikerketa Batzordeko kide gisa, ikerketan pazienteek duten ikuspegia emanez. Bestalde, Jaime Lafita eta DalecandELA funtsezkoak izan dira brainlab berri hau eratu eta abiarazteko, bereziki Biobizkaian AEAn ikerketa-ildo berri bat sortzeko.
Jardunaldiari amaiera emateko, hitzaldi zientifiko bat eman du Don W. Cleveland neurobiologoak, Kaliforniako Unibertsitateko (San Diego) medikuntza molekular, zelular eta Neurozientzien Saileko zuzendariak. Cleveland irakaslea nazioarteko erreferentetzat hartzen da gaixotasun neurodegeneratiboen arloan, eta, bereziki, AEAren inguruan, eta ekarpen handiak egin ditu gaixotasun horren tratamenduan.
