Bilboko San Inazio auzoko instalazioak handitzeari esker, Haurreskolan hasiko diren haurrek datorren astean helduko diote euren hezkuntza-aldiari.
Bilboko San Inazio auzoko Haurreskolak beste hiru ikasgela gehiago izango ditu, 0 eta 2 urte bitarteko 39 haurrentzat. Haurrek datorren astean estreinatuko dituzte ikasgelak, eta gaur goizean, Begoña Pedrosa Eusko Jaurlaritzako Hezkuntzako sailburuak eta Eider Bilbao Bilboko Udaleko Hezkuntzako zinegotzi ordezkariak bisitatu dituzte ikasgela berriak, Irune Muguruza Haurreskolak Partzuergoko kudeatzailearekin eta beste ordezkari instituzional batzuekin batera.
2023ko irailaz geroztik, Haurreskolak partzuergoak, Eusko Jaurlaritzako Hezkuntza Sailari atxikia denak, doako zerbitzua eskaintzen du, eta proiektua 2030erako Erronka Demografikorako Euskal Estrategian jasotako ekintza nagusietako baten barnean hartzen da. Bilboko Udaleko Hezkuntza Sailak bultzatu du San Inazioko instalazioak handitzea, Europar Batasunak finantzatutako NextGenerationEU Suspertze, Eraldatze eta Erresilientzia Planaren bidez.
Hain zuzen ere, bisitan, Hezkuntzako sailburuak nabarmendu du Bilboko udalak Bizkaiko hiriburuko haur-eskolen plaza kopurua handitzeko konpromisoa betetzen lagunduko duen espazioa eskaintzeko izan duen prestasuna. Era berean, aditzera eman duenez, administrazioen arteko ahalegin bateratu horri esker, familia gehiagok jada «konfiantzazko zerbitzua dute, beren seme-alabentzako hezkuntzarik onena lortze aldera eta lana eta familia hobeto uztartze aldera». Haurreskola Partzuergoaren proiektuak ikasleen garapen integrala sustatzen du, eta, horretarako, familiekin elkarlanean aritzen da eta haur bakoitzaren prozesua eta erritmoa errespetatzen du.
Haurreskolak partzuergoak 2024-2025 ikasturtean 238 haur-eskola ditu Euskadiko 174 udalerritan, eta 8.861 plaza eskaintzen ditu guztira.
Instalazio berriak
30m²-ko hiru espazio berri dira, Haurreskolako gainerako gelekin lotzen den korridore batean zehar antolatzen direnak. Instalazio berri horien akaberei dagokienez, Bilboko azken 5 Haurreskoletan (Kontxa, Zamakola, Iru Arteta eta Mina del Morro, Indautxu) ezarri izan diren akabera berberak dituzte, azalera leunak, argiztapen handia eta gela kristaldunak dituzte, haurrak hobeto zaintzeko.
San Inazio Haurreskolak hartzen duen eraikina San Inazio HLHIn (Asturias kalea, 9) integratuta dago, nahiz eta bi ikastetxeek sarrera desberdinak izan. Nabarmentzekoa da beste 39 plaza horietarako matrikulazio-aldia abenduaren amaieran hasi eta urtarrilean amaitu zela, eta gaur egun plaza horiek guztiak beteta daudela. Instalazio berri horiek otsailaren lehen astean irekitzea aurreikusten da.
Handitze horrekin, Bilbok 0 eta 2 urte bitarteko adingabeentzako 792 plaza izango ditu doako Haurreskolako egungo 16 zentro publikoetan. Bi erakundeen asmoa da hezkuntza goiztiar publikoa eta doakoa unibertsalizatzeko bidean aurrera egitea. Bide horretan aurrera egitera begira, 0 eta 2 urte bitarteko doako beste 130 plaza sortuko ari dira 2025. urtearen amaierarako, 3 milioi euroko inbertsioa eskatuko dutenak (NEXT funtsak. Suspertze, Eraldatze eta Erresilientzia Plana. 21. osagaia. Hezkuntza-sistemaren modernizazioa eta digitalizazioa, 0-3 urte bitarteko hezkuntza goiztiarra barne).
