Euskarazko ikasmaterialen dokumentazio zentroak 38.055 material katalogatuta ditu, une honetan eta euskarazko ikasmaterialak hezkuntza komunitateko edozein partaidek baliatu ahal ditu. Pedrosa sailburuak esan duenez, Euskara eta Hizkuntzak Ikasteko Institutuaren sorrerarekin alor honetako estrategia garatuko da aurrerantzean.
Begoña Pedrosa Hezkuntza sailburuak EIMA (Euskarazko Ikas Materialgintza programa), euskarazko ikasmaterialen dokumentazio zentrora bisita egin du, gaur. Euskarazko ikasmaterialak biltzen eta katalogatzen dituen dokumentazio-zentroan 38.055 material daude katalogatuta. Azken 20 urteetan dihardu dokumentazio-zentro honek euskarazko ikasmaterialak biltzen eta katalogatzen.
Askotariko baliabideak kontsultatu eta eskuratu daitezke katalogoaren egoitzan edo webgunean: curriculumeko baliabideak (testuliburuak, material didaktikoak, irakurgaiak…) edota irakas-jardunerako material osagarriak (bideoak, aplikazioak, monografiak, jolasak, literatura-lanak…).
EIMA programa bere sorreratik EAEko ikastetxeetarako ikasmaterialgintza bultzatzen aritu da eta betebeharretako bat Ikastetxeei, irakasleei eta ikasleei eskueran dituzten edo izan ditzaketen euskarazko ikasmaterialaren berri ematea izan da. Euskarazko ikasmaterialgintzan interesa izan duten kanpoko ikertzaile edota irakasleek ere baliatu izan dute dokumentazio zentroaren zerbitzua.
Begoña Pedrosa Hezkuntza sailburuak azaldu duenez, “Hezkuntza Sailak euskarazko materialen katalogazioan egindako lana handia da. Argitaletxeek argitaratutako materialaz gain, EIMA eta IRALE programen bidez adituek zein irakasleek sortutakoa ere eskuragarri dago”. Gaineratu du, Euskara eta Hizkuntzak ikasteko Institutuaren sorrerarekin materialgintzako estrategia garatuko dela aurrerantzean.
Dokumentazio zentro honen misioa materialak ikastetxe eta irakasleen irakasleen eta ikastetxeen eskura jartzea da. Gaineratu du eskuratzen erraza dela, sarea erabiliz, kontsultak egiteko eta informazioa eguneratzeko aukerak eskaintzen baiditu. Askotariko baliabideak kontsultatu eta eskuratu daitezke gaur egun katalogoaren egoitzan (liburutegian) edo webgunean: curriculumeko baliabideak (testuliburuak, material didaktikoak, irakurgaiak……) edota irakas-jardunerako material osagarriak (bideoak, aplikazioak, monografiak, jolasak, literatura-lanak…).
EIMA katalogoaren funtsa
EIMA katalogoaren funtsa dinamikoa da, urtez urte handitzen doana; gaur gaurkoz 38.055 material daude katalogatuta; horietatik 11.800 inguru baliabide digitalak dira. Hona hemen horietako batzuk:
- Curriculuma lantzeko berariaz sortutakoak: ikasliburuak, gidaliburuak, lan-koadernoak, ariketa-koadernoak… 13.378 baliabide
- Webgune, simulazio… didaktikoak, 1.173 baliabide
- Irakasleek eskolak prestatzeko material monografikoak, 5.668 baliabide
- Ikasleentzako kontsulta-materialak, 4.195 baliabide
- Zinema dokumentala, 780 baliabide
- Haur- eta gazte-literatura, 7.805 baliabide
- Hezkuntza Sailaren onespena duen materiala, 9.911 baliabide
- IRALEn sortutakoak, 823 baliabide
- Haur eta gazteentzako dokumental, film eta bideo didaktikoak, 6.126 baliabide
- Jolas didaktikoak, 330 baliabide
