Eusko Jaurlaritzako Etxebizitza eta Hiri Agendako sailburu Denis Itxasok, CIAREeko (Arkitekturari eta Real Estateri buruzko Ezinbesteko Ezagutzak) presidente Fernando Catalan de Oconek eta Visesako zuzendari nagusi Carlos Quindosek «Gizarte Laguntzako Etxebizitza Industrializatuaren Liburu Zuriaren» lehen edizioa aurkeztu zuten atzo arratsaldean Zorrotzaurreko Terminalean. Itxasok nabarmendu zuenez, Etxebizitza Sailburuordetzaren Eraikal programak bultzatutako lan honek «eraikuntzaren trantsizioa azkartzea du helburu, jasangarritasuna kontuan hartuta», eta sektorearentzako gida gisa balio du, teknologia berriei eta prozesu berritzaileei buruzko azterketa bat gehituz, eraikuntza azkarragoa, jasangarriagoa eta efizienteagoa izan dadin.
Ekitaldian, sailburuak azpimarratu zuenez, «eraikuntzaren sektoreak egiturazko defizitak ditu, hala nola eskulan falta, prestakuntzari eta profesionalizazioari lotutako erronkak, eta eraikuntza-prozesuak azkarragoak izatea. Eraikuntza-industria erronka horien guztien erantzuna da, eta Euskal Autonomia Erkidegoak, industriaren esparruan Europako sorleku eta erreferente denak, bere estrategia propioa izan behar du Estatu-mailan aldaketa horren buru izateko. Eraikuntzako gure enpresa tradizionaletako batzuek hori ulertzen jakin dute eta urrats hori ematen ari dira, baina oraindik asko dugu egiteko.»
Erronka nagusietako bat herritarrek «aurrefabrikatutzat» jotzen denarekiko duten pertzepzio negatiboa da, askotan kalitate txikiagoarekin edo behin-behinekotasunarekin lotzen baitute. «Funtsezkoa da aurrez pentsatutako joera eta ideia horiek baztertzea, nazioarteko erreferenteetan, sektoreko profesionalen pedagogian eta komunikabideen funtsezko eginkizunean oinarrituta, eraikuntza industrializatuak eskaintzen duen kalitatearen eta zehaztasunaren benetako irudia transmititzeko», gaineratu zuen sailburuak.
Industrializazioa, eredu efizienteagoa eta etxebizitza jasangarria lortzeko
Ekitaldiak agerian utzi zuen nola eraikuntzaren sektorearen modernizazioak, industrializazioaren bidez, Euskal Autonomia Erkidegoan gaur egun dauden etxebizitza-beharrei erantzuten dien. «Eraikuntza-sektorea industria inklusiboago bihurtzeko aukera paregabea dugu aurrean, lan-baldintza hobeak eskaintzeko eta ingurumenaren, ekonomiaren eta gizartearen jasangarritasun-eskaeretara egokitzeko gai izango dena», adierazi zuen sailburuak.
Bestalde, CIAREeko presidente Fernando Catalan de Oconek gaineratu zuenez, «liburu zuri honek etorkizun efizienteago baterako bidea erakusteaz gain, oraindik ere irauten duten administrazio-, finantza- eta araudi-oztopoak gainditzeko beharra ere erakusten du». Ildo horretan, adierazi zuen «sektoreko eragile guztien arteko lankidetza funtsezkoa izango dela eraldaketa hori eraginkorra izango dela bermatzeko».
«Gizarte Laguntzako Etxebizitza Industrializatuaren Liburu Zuriak» arkitekturako jardunbide egokien adibideak biltzen ditu, eta nabarmentzen du industria-prozesuen erabilerak izan behar duela egikaritze-epeak murrizteko eta ingurumen-inpaktua minimizatzeko bidea. Ildo horretan, Visesako zuzendari nagusiak aitortu zuen «Eusko Jaurlaritzaren industrializazio-estrategia funtsezkoa dela kalitatezko etxebizitzak modu efizientean eraikitzeko, herritarrentzako etorkizuna hobea izan dadin lagunduz». Gainera, Eraikinaren Pasaporte Digitala bezalako tresna digitalak integratzeak aktibo publikoen kudeaketa efizienteagoa bermatzen du, hauek eraikitzen direnetik bizitza baliagarria amaitu arte, sektorean ekonomia zirkularra sustatuz.
Visesak Elkarrizketa Lehiakorrean bildutako ikaskuntzak ere aurkeztu zituen. Ekimen hori aitzindaria izan da Sopela-Asun 33 etxebizitza babestu garatu eta egikaritzeko, eraikuntza-prozesu industrializatuak erabiliz. Proiektu hori erreferentea izan da Euskal Autonomia Erkidegoan etxebizitza sozialak eraikitzeko soluzio praktiko eta eskalagarriak definitzeko. «Administrazio-, finantza- eta arau-erronkei aurre egin behar badiegu ere, lanean jarraitu behar dugu ekosistema sendo bat izateko, eta horrela, etxebizitzaren industrializazioan aurrera egiten jarraitu ahal izateko», nabarmendu zuen Quindos jaunak.
Administrazio publikoaren zeregina aldaketaren bultzatzaile gisa
Administrazio publikoak funtsezko eginkizuna du etxebizitza-eskatzaile gisa, eta eragile aitzindariaren rola hartzen du etxebizitza industrializatuaren sustapenean. Ildo horretan, lizitazio-prozesuek eta erosketa publikoak bat etorri behar dute eraikuntza industrializatuarekin, erosotasun-estandarrak eta bidezko erabiltzaile-esperientzia bermatuz.
Euskal Autonomia Erkidegoa eraldaketa horren buru izan dadin, ezinbestekoa da eraikuntza-industriarako estrategia propioa izatea, haren industria-historia eta -tradizioaren ildotik. Esparru horretan, Euskadiko Hirigintza eta Etxebizitza Foroa sektoreko eragileen arteko elkarrizketarako eta koordinaziorako gune izango da.
Eusko Jaurlaritzak bere gain hartzen du prozesu horretan duen erantzukizuna, Gizarte Laguntzako Etxebizitza Industrializatuaren Liburu Zuria bultzatuz. Liburu hori funtsezko tresna da etxebizitza-premiei erantzuteaz gain, enplegua eta aberastasuna sortzen duen produkzio-sektorea sendotzeko etorkizuneko inbertsioa ere izango den industria bat egituratzeko.
Era berean, etxebizitza-produkzioa gero eta eskari handiagora eta aldaketa demografikoetara egokitzea funtsezko erronka da. «Aldaketa hori bideratzeko funtsezko eragileetako bat administrazioa izango da, datozen urteetan behar dugun etxebizitza kopuru horren zati handi bat kontratatuko baitu etxebizitza-eskaera ikaragarrira hurbiltzeko. Administrazioak eraikuntzaren industria eraginkortasunez eta ausardiaz txertatzen jakin dezan. Horixe da Etxebizitza eta Hiri Agenda Sail gisa aurre egin nahi diogun erronka», adierazi zuen Itxasok.
Etorkizunarekiko konpromisoa
Itxaso sailburuak honako hau azpimarratuz amaitu zuen: «liburu hau funtsezko tresna da etxebizitza publikoaren eredu jasangarriago baterantz aurrera egiteko, pertsona zaurgarrienen beharrei erantzuteaz gain, Euskal Autonomia Erkidegoan lehiakortasuna eta berrikuntza bultzatuko baititu». Azken batean, Euskal Autonomia Erkidegoak, eraikuntza industrializatuan ere aitzindari izan nahi duenak, bere kapital industrialari balioa eman behar dio, EAEko BPGd-an funtsezkoa den sektore bat eraldatzeko eta etxebizitzen eraikuntzan erritmo berri bat ezartzeko, etxebizitzen merkatua «malgutzen» lagunduko duena.
