Amaia Barredo Eusko Jaurlaritzako Elikadura, Landa Garapen, Nekazaritza eta Arrantzako sailburua Araban, Lapuebla de Labarcan, egin den Uztaberri Egunaren hemeretzigarren edizioan izan da gaur goizean. Jardunaldi tradizionalean, herrian dauden hogei upategiek ateak ireki dituzte azken uztarekin egindako Arabako Errioxako ardoen aukera zabala erakusteko.
Barredok adierazi duenez, “Ardo Merkatuaren Espainiako Behatokiaren datuen arabera, 2024an –urria arte– Arabako ardoak Euskadiko ardo-esportazioen motorra izan ziren, bolumenaren % 69rekin eta fakturazio osoaren % 90ekin. Horrek esan nahi du % 9,1 litro gehiago esportatu zirela, % 4,5 gehiago fakturatuta «.
“Gaur ilusio handiko eguna da Arabako Errioxarentzat, azken urteko uztarekin egindako ardoen zaporea zein den jakingo baitugu eta, beste behin ere, bere kalitate bikaina egiaztatuko baitugu. Lehen sektorearen arlo honetan berehalako etorkizuna eraikitzen eta prestatzen ari gara merkatuek bizi dituzten merkataritza-aldaketa guztien barruan. Beharrezkoa da Arabako Errioxak ongizatean hazten jarraitzea gure herriaren garapenaren barruan”, adierazi du Amaia Barredok.
“Arabako Errioxako ardoen bikaintasunaz eta tradizioaz jabetuta, Eusko Jaurlaritzak upategiekin, mahastizainekin eta sektoreko eragileekin batera lan egiten du ardo horien proiekzioa indartzeko eta Euskadirentzat estrategikoa den sektore honen lehiakortasuna eta etorkizuna bermatzeko, Arabako Errioxako ardoek Estatuko eta Nazioarteko merkatu onenetan merezi duten lekua izango dutela ziurtatuz”, erantsi du sailburuak.
Imanol Pradalesekin batera, Amaia Barredo sailburua, Ramiro González Arabako diputatu nagusia, Noemi Agirre Arabako Nekazaritzako diputatua eta Maite Córdoba Lapuebla de Labarcako alkatea jardunaldiko gune nagusietatik igaro dira.
Pregoia irakurri eta topa herrikoia egin ondoren, jaia hainbat jarduerarekin hasi da, landa-eremuak eta mahastizaintzak eta ardogintzak eskualdean duten garrantzia agerian jartzeko. Herriko zortzi upategitan artisau-produktuak eskaini dituzte, besteak beste, erroskilak, olibak, ardoa eta mahats-muztioarekin egindako “arrope” goxoa.
Bisitari askok parte hartu dute HAZI Fundazioak “Zentzumenez gozatu ardoarekin” izenburupean antolatu duen eta Mikel Garaizabal enologoak komentatu duen dastaketan. Gainera, Uztaberri Egunean parte hartu duten upategiek euren ardoak eskaini dizkiete bisitariei El Plano enparantzan.
Arabako ardoen esportazioak
Ardo Merkatuaren Espainiako Behatokiaren datuen arabera, 2024an Arabako ardoak Euskadiko ardo-esportazioen motorra izan ziren, bolumenaren % 69rekin eta fakturazio osoaren % 90ekin, eta horrek esan nahi du 28 milioi litro (+% 9,1) esportatu zirela, 173,1 milioi euroko balioarekin (+% 4,5).
“Egoera globala zaila izan arren, eta hainbat merkataritza-faktorek, hala nola inflazioak, garraioaren eta horniduren krisiak eta kontsumitzaileen erosteko ahalmena murriztu izanak produktu asko garestitu izanaren ondorioz, ardoaren nazioarteko merkataritza geldiaraztea eragin duten arren, Euskadik % 12,9 ardo gehiago esportatu zuen 2024ko lehenengo hamar hilabeteetan, 40,7 milioi litrora iritsi arte, 2023ko aldi berarekin alderatuta. Fakturazioa % 5 handitu zen, 191,7 milioi eurora arte”, adierazi du Amaia Barredok.
JDB duen ardoak, Euskadiko esportazioen eragilea denak balioaren % 84 eta bolumen osoaren % 61,5 izanik, % 5,3 egin zuen gora balioan eta % 13,1 bolumenean. Ardo beltzak eta gorriak baino gehiago egin zuen gora ardo zuriak, azken urteetako mundu mailako joerari jarraituz. Nolanahi ere, ardo beltzak eta gorriak dira argi eta garbi nagusi JDB duten ardoen Euskadiko salmentetan, eta 2024an esportazioek gora egin zuten.
