GAZ Emantzipaziorako Zerbitzuak aurrez aurreko hiru bulego ditu zabalik jada, Barakaldon, Bilbon eta Gasteizen, Xabier Legarreta Eusko Jaurlaritzako Ongizate eta Erronka Demografikoaren sailburuordeak eta Adrián López Gazteria eta Emantzipazio zuzendariak gaur iragarri duten bezala. Gainera, Eusko Jaurlaritza udalerri berrien bila dabil, eta gutunak bidali ditu Irun, Donostia, Zarautz, Laudio, Amurrio, Getxo, Durango, Santurtzi eta Enkarterriko mankomunitatera, aukera berrien bila.
GAZ Emantzipaziorako Zerbitzuak Eusko Jaurlaritzaren aholkularitza- eta laguntza-zerbitzu pertsonalizatua da, gazteentzako autonomia-ibilbideak eta emantzipazio-kultura berria sustatzeko. Iaz 5.448 kontsulta jaso zituen guztira, horietako gehienak, 10etik 8, Whatsapp bidez, gaur azaldu dutenez.
Iazko datuen arabera, kontsulten % 96 etxebizitzarekin lotuta zeuden. Ia 5.500 kontsultetatik hiru (% 76) lana zuten eta jada emantzipatuta zeuden pertsonek egin zituzten; 2023an, ehuneko hori % 60koa baino ez zen. 2024an zerbitzura hurbildu ziren pertsonen profila 26 urtetik 29 urtera bitarteko pertsonarena zen; 2.700 pertsona baino gehiago zeuden adin-tarte horretan. Bestalde, emakumeek egindako kontsultek gora egin dute 2024an, eta kontsulta guztien % 65 izan dira.
Lurraldeen arabera, % 51 Bizkaitik egin dira, % 34 Gipuzkoatik eta % 14 Arabatik. Kontsulten % 1 Espainiako Estatuko beste erkidego batzuetatik egin dituzte.
GAZ emantzipazio-prozesua hasi nahi duten gazteei zuzendutako informazio-, orientazio- eta laguntza-zerbitzu pertsonalizatua da. Bi bulego fisiko ditu, Bilbon eta Barakaldon, baina herritar guztien eskura dago beste kanal batzuen bidez: www.euskadi.eus/gaz webgunea, 646 109 126 telefono-zenbakia (WhatsApp bat ere bidal daiteke zenbaki horretara) eta gaz@euskadi.eus helbide elektronikoa. Gainera, komunitate birtual bat du (gaz.eus) bizitza-proiektu berri bati ekingo dioten pertsona guztiak konektatzeko.
GAZ zerbitzua nabarmentzen da gazte bakoitzaren bizi-proiektuari lotutako orientazio pertsonalizatuagatik. Horrela, gazteak erabakitzen du zer prestazio-mota behar duen, zenbat denboraz eta zer komunikazio-kanalen bidez, online edo aurrez aurre.
GAZ zerbitzura jo dezakete emantzipatzeko asmotan dauden 18 urtetik 30 urtera bitarteko gazte guztiek, bai eta emantzipazio-prozesua hasi dutenek ere, prozesua eten badute ere, hura sendotu ahal izateko. Baita mugikortasun-proiektu bat hasi nahi dutenek edo garatzen ari direnek ere.
GAZ zerbitzuaren bidez, honako hauei buruzko informazio eguneratua jasotzen dute: enplegurako prestakuntza, graduondoak eta ikerketa, enplegua bilatzeko tresnak, ekintzailetza sustatzeko laguntzak, alokairuko parke publikoko etxebizitza bat nola eskatu edo alokairuko etxebizitza pribatu bat ordaintzeko laguntza, edo gizarteratzearen arloan dauden laguntzak.
