Barakaldon, 2024an, langabezia-tasak behera egin zuen berriro, eta % 11,5ekoa izan zen abenduaren 31n. Horrela, azken urteetan erregistratutako beheranzko joera finkatu da, 2020an covidaren pandemiak eragindako parentesia izan ezik. Izan ere, zifra hori txikiena da 2008. urtetik aurrera krisi ekonomikoaren eragina nabarmen geratu zenetik.
«Beti da positiboa langabezia indizea murriztea, eta ospatu beharreko zerbait dela uste dut, baina badakigu murrizketa ez dela nahiko genukeen bezain zabala, eta, beraz, lanean jarraitu behar dugu», ziurtatu du David Solla Inguraldeko presidenteak. «Nolanahi ere, barakaldarrentzat enplegua eta lan-aukerak sortzea da Udalaren apustu nagusia, eta uste dugu enplegua sustatzeko jarduerak eraginkorrak direla eta lan-merkatua hobetzen laguntzen ari direla», adierazi du.
Ildo horretan, Sollak gogorarazi du Udalak sustatutako ekintzen artean Tokiko Enplegu Plana indarrean dagoela une honetan. Plan horrek 1,02 milioi euroko dirulaguntza du, eta 63 pertsona zuzenean kontratatzea jasotzen du, onura publikoko 30 proiekturi laguntzeko. Enpresentzako laguntzak ere aurreikusten ditu, beste 30 pertsona kontratatzeko.
Gaur aurkeztutako 2024ko Barakaldoko lan-merkatuaren bilakaerari buruzko datuak Inguraderen Behatoki Sozioekonomikoak bildu ditu, Lanbide-Euskal Enplegu Zerbitzuak erregistratutako informazioan oinarrituta. Hala, iazko urtearen amaieran, erroldatutako 5.683 pertsona zeuden langabezian alta emanda. Horietatik 4.076k zerbitzuen sektorean eskatzen dute lana ( % 72), eta eraikuntzak edo industriak ehuneko oso txikiak dituzte ( % 8 eta % 6,5, hurrenez hurren).
Gizonen eta emakumeen enpleguetan ere aldea nabarmena da. 5.683 eskatzaileetatik 3.316 emakumeak ziren (13,41eko langabezia-tasa) eta 2.367 gizonak (9,59ko langabezia-tasa). Era berean, adin-tarteen arabera, 45 urtetik gorako pertsonak dira ugarienak, Barakaldon erregistratutako langabezia osoaren % 56 baitira; 25 urtetik beherakoak, berriz, % 9 baino ez dira.
«Beraz, Barakaldoko langabezia-egoeran nagusi diren hiru alderdi nagusi ditugu: zerbitzuen sektorea, 45 urtetik gorako pertsonak eta emakumeen kolektiboa» esan du Sollak. «Gure asmoa da haien gainean lan egiten jarraitzea, egoera horri buelta ematen laguntzeko».
GIZARTE SEGURANTZAKO AFILIAZIOA
Bestalde, Sollak nabarmendu du 2024an Gizarte Segurantzako afiliazioaren datua 30.000 pertsonatik gorakoa izan zela 2024ko hilabete guztietan, eta ekitaldia 31.439 afiliaturekin itxi zela. «Nahiz eta zifra hori pixka bat murriztu dugun (iaz 32.000 izan ziren), gogora ekarri nahi nuke duela 10 urte bakarrik 27.000 afiliatu baino gutxiago zeudela, eta, beraz, esan dezakegu nahiko egoera positibo egonkorra lortu dugula», amaitu du.
Era berean, egindako kontratuen kopurua aldatu egin da 2024an, urte-sasoiaren eta eskatutako jardueraren arabera. Horrela, otsailean eta abuztuan hilean 1.500 kontratu inguru ofizial egin ziren, eta ekainean eta abenduan, berriz, ia 2.200 kontratu egin ziren horietako bakoitzean. Zehazki, abenduan 2.168 kontratu sinatu ziren; horietatik ia % 94 zerbitzuen sektorekoak izan ziren, eta % 20 mugagabeak.
Langabeziaren bilakaera historikoaren ikuspuntutik, David Sollak 2024an erregistratutako % 11,5eko indizea balioetsi nahi izan du. «2009an % 14,8ko tasa genuen, 2012an eta 2013an maximora iritsi zena % 20.4ko indizearekin. Hortik aurrera, eta pandemiak eragindako krisia gaindituz, gutxika-gutxika murrizten joan gara urtero, eta horrek indartu egiten gaitu enpleguaren aldeko gure konpromisoan eta estrategian «, esan du Inguraldeko presidenteak.
