Erakundeak martxoan bilduko dira 2026an Martuteneko kartzela zaharra eraisteko lanak antolatu eta banatzeko, eta 400 etxebizitza eta bizitoki eraikitzeko, horietako gehienak babestuak eta alokairu eskuragarrian
Eusko Jaurlaritzako Etxebizitza eta Hiri Agendako sailburu Denis Itxasok bilera bat egin zuen atzo, osteguna, Madrilen, SEPES erakundeko zuzendari Leire Iglesiasekin. Bilera horretan, martxoan bilera instituzional baterako deialdia egitea erabaki zuten, Txomin Enea auzo berria osatzeko operazioan parte hartzen duten eragile publiko guztiak biltzeko Eusko Jaurlaritzako Etxebizitza eta Hiri Agenda Sailak, Etxebizitza eta Hiri Agenda Ministerioaren mendeko SEPES erakunde publikoak eta Donostiako Udalak elkarlanean jardun beharko dute Martuteneko kartzela zaharra eraitsi eta 400 etxebizitza eskuragarri inguru eta alokairuko zuzkidura-bizitokiak elkarrekin eraikitzeko.
Etxebizitza eta Hiri Agenda Sailak aurreakordioa lortu zuen joan den urtarrilean Donostiako Udalarekin, hiri-esparru horretako lurzoruen % 65 doan lagatzeko. Bertan, Hiri Antolamenduko Plan Orokorraren (HAPN) arabera Txomin-Enea auzoaren bigarren fasea eraikitzea aurreikusten da. Lursailaren gainerako % 35a gaur egun kokatuta dagoen Martuteneko espetxeak hartzen du, Barne Ministerioa duela hiru urtetik eraikitzen ari den Zubietako espetxe berria martxan jartzen denean desagertuko denak. Bitartean, azpiegiturak erabiltzen jarraitzen du, presoak ekipamendu berrira eraman arte.
Horrela, hiru aldeetako erakundeek aztertu beharko dute Udalak onartutako urbanizazio-proiektua, eta urbanizazio-figura arin eta eraginkorrenak ezarri beharko dituzte bete beharreko izapide guztietan epeak laburtzen saiatzeko.
Eusko Jaurlaritzak hitzarmen bat arindu nahi du, Udalak lurrak Visesa etxebizitza-sustatzaile publikoaren alde laga dezan. Era berean, Espainiako Gobernuaren etorkizuneko etxebizitza-erakunde publikoak etxebizitza babestuen eraikuntzan izango duen partaidetza finkatzeko ere balio beharko du bilerak.
Planteamendu hori arlo horretako ministro Isabel Rodríguezek joan den ostiralean Txomin-Enea esparrura egindako bisitaren ondoren sortu zen. Ministroarekin batera, Eusko Jaurlaritzako Etxebizitza eta Hiri Agendako sailburu Denis Itxaso izan zen bertan. Bisita horretan, Itxasok aukera izan zuen ministroari esparrua erakusteko eta hirigintza-eragiketaren baldintzatzaileak azaltzeko.
