Hezkuntza Sailak 4.542 lanpostu finkatu ditu; 3.542 irakasle, hezkuntza bereziko 520 profesional, eta sukalde eta garbiketako 480 lanpostu, eta 1.268 irakasle-plaza deituko ditu irailerako.
Sukaldeko eta garbiketako langileen Enplegu Eskaintza Publikoaren esleipenen zerrendak argitaratzearekin bat, Hezkuntza Sailak amaitu ditu orain arte deitutako lanpostuak finkatzeko prozesu guztiak. Guztira, 4.542 pertsonak lortu dute funtzionario edo langile finko izaera.
Lanpostu finkatu gehienak irakasleen kidegoari dagozkio, 4542 plaza (1268 plaza gehiago), Bigarren Hezkuntzako eta Lanbide Heziketako kidegoetarako plazen deialdia gauzatu ondoren. Laster argitaratuko dira deialdiaren baldintzak eta epeak. Probak aurtengo irailaren bigarren hamabostaldian egingo dira. Enplegu-eskaintza horrek % 4ra murriztuko du bitartekotasun-tasa Bigarren Hezkuntzan eta Lanbide Heziketan.
Eusko Jaurlaritzak irakasleak eta klaustroak egonkortzeko duen konpromisoa azpimarratu du Pedrosa sailburuak. “Helburua da Enplegu Eskaintza Publikoen prozesuen urteko dinamikari eustea, Haur/Lehen Hezkuntzako kidegoak, irakaskuntza ertainenak eta beste kidego batzuenak (Ikuskaritzakoa, adibidez) konbinatuz. Hori 2025ean egingo da. Azkenik, klaustroak indartzeko eta bitartekotasun-portzentajea murrizteko hartutako konpromisoak bete direla gogorarazi du.
Halaber, 520 plaza esleitu dira Hezkuntza Berezian. Hezkuntza-laguntzako 476 espezialista, zeinu-hizkuntzako 14 interprete, 13 fisioterapeuta, 10 terapeuta okupazional, 3 gizarte-langile eta transkripziorako eta materiala egokitzeko 4 pertsona dira.
Sukaldeko eta garbiketako langileei dagokienez, 480 profesional gehiago finkatu dira; horietatik 283 sukalde-zerbitzuari dagozkio eta beste 197 garbiketa-zerbitzuari.
Sindikatuekin egindako akordioek hezkuntzan hobekuntza dakarte
2022ko maiatzaren 26an gehiengo sindikalarekin lortutako akordioari esker, talde bakoitzeko ikasle-ratioak murriztu ziren, pedagogia-berrikuntzako figura berriak sartu ziren, eta hezkuntza-premia bereziak dituzten ikasleei arreta emateko baliabideak nabarmen handitu ziren.
Aurten bitarteko izaera, oro har, % 8tik behera murriztuko da. Datorren legegintzaldirako ezarritako helburua ehuneko hori % 5era jaistea da, orain arteko irakasle egonkorren daturik onenak lortuz. 2019. urteaz geroztik, 9.635 plaza deitu dira irakasleentzat.
