Hondarribiko Klub Nautikoa ILCA4 klaseko Espainiako Txapelketaren egoitza izango da. Bela nazionaleko ekitaldi aipagarri honek kirol honetan etorkizun oparoa izan lezaketen gazteak elkartuko ditu martxoaren 5etik 9ra bitartean Higerko Badian. 16 eta 18 urtez azpiko 140 estropadalarik parte hartuko dute, eta 10 autonomia-erkidegotatik iritsiko dira: Andaluzia, Katalunia, Balear Uharteak, Valentzia, Kantabria, Euskadi, Kanariak, Murtzia, Galizia eta Asturias.
Txapelketa estropadalari gazteentzako, etorkizuneko estropadalarien harrobiarentzako, aukera bat izateaz gainera, sektoreko entrenatzaileen, epaileen, arbitroen eta profesionalen topaketa ere izango da, eta 30 pertsonak baino gehiagok parte hartuko dute antolaketa- eta logistika-lanetan. Txapelketako lau egunetan 12 proba egitea aurreikusten da, eta parte-hartzaileek uretan duten talentua eta trebetasuna erakutsiko dituzte.
Ekitaldia, besteak beste, Eusko Jaurlaritzaren eta EKPren, Gipuzkoako Foru Aldundiaren, Hondarribiko Udalaren eta Arrantzale Kofradiaren laguntzari esker egin ahal izango da.
Ekitaldiaren aurkezpena eta agenda
Martxoaren 5ean, 19:00etan, egingo da Hondarribiko Klub Nautikoaren egoitzan txapelketaren aurkezpen ofiziala, eta bertan izango dira babesleak, laguntzaileak eta gonbidatutako erakundeak ere. Ekitaldian autonomia-erkidego parte-hartzaileen desfilea eta, HAZI Fundazioaren eskutik, euskal produktuen dastaketa egingo dira. Gainera, Emakumeak Mugimenduan lehiaketaren barruan, sari oso berezia emango da: txapelketako bela bat, aitorpen gisa. Ekitaldi horretan, erakundeen beste hainbat ordezkarirekin batera, Leandro Azkue Eusko Jaurlaritzako Arrantzako eta Itsasertzaren Garapeneko sailburuordea izango da.
Hau da txapelketaren programa:
- Martxoak 5: Ekipamenduaren kontrola eta erregistroa (9:00h – 18:00h). Taldeburuen bilera (18:30h).Txapelketaren aurkezpen ofiziala, prentsari irekia (19:00h)
- Martxoak 6tik 9ra: Estropadak 12:00etatik aurrera egunero.
- Martxoak 9: Amaiera eta sari-banaketa (18:00h).
Hitzordu garrantzitsua belaren etorkizunerako
ILCA4 klaseko Espainiako Txapelketa funtsezko plataforma da talentu berriak prestatzeko, aurreko lehiaketetan nabarmendu diren maila handiko estropadalariekin. Higerko Badiara hurbilduko direnen artean, honako hauek nabarmentzen dira: Blanca Ferrando, 2024ko Optimist txapelketako munduko txapelduna; bere ahizpa Marta Ferrando, 16 urtez azpiko Espainiako Kopako txapelduna Tenerifen; eta Iker Mujika, aurtengo Optimist txapelketako taldekako munduko txapelduna eta 2024ko Excellence Cup txapelketako irabazlea.
Euskadiko taldea Hondarribiko Klub Nautikoko, Donostiako Errege Klub Nautikoko eta Abrako Itsas Kirol Errege Klubeko (Getxo) estropadalariek osatzen dute, eta abantaila estrategikoa izango du bertako uretan lehiatzean, estropada-eremuaren baldintzak ezagutzen baititu.
Ekitaldi honek sendotu egiten Hondarribia bela-txapelketak antolatzeko erreferente gisa, eta indartu egiten du Klub Nautikoak kirol hau nazio mailan sustatzeko duen konpromisoa. Hondarribiko hainbat ikastetxetako ikasleek itsasontzi batetik ikusi ahal izango dute arraunketa.
