Gobernu Kontseiluak, astearte honetan, baimena du Susana García Chueca Mugikortasun Jasangarriaren sailburuak sina dezan Eusko Jaurlaritzak, Irungo Udalak eta ADIFek sinatutako hitzarmenaren aldaketa eta luzapena. Hitzarmen horren bidez, eraikiko da Irungo tren-geltokiko bidaiarien eraikin berria hiriko gainerakoarekin lotuko duen hiri-pasabidea —gaur egun Estatuko trenbide-administrazioa eraikitzen ari da eraikin berri hori—.
Hitzarmenak eraikuntza-proiektua idazteko oinarriak ezartzen ditu, baita obrak egiteko eta pasabide berria mantentzeko oinarriak ere. Aldaketa horrek erantzuten dio Euskal Trenbide Sarearen (ETS) linea ADIFen trenbide-zabaltzara hurbiltzeko ekimen berrira egokitu beharrari —ETSren linea eta ADIFen trenbide-zabaltza paraleloak dira—.Integrazio horren helburua da herritarrek erabiltzeko lurzoruak liberatzea eta zenbait trenbide-eraikin kontserbatzea. 2022ko abenduan sinatutako hitzarmenaren aldaketarekin, bi urtez luzatuko da hitzarmenaren indarraldia, Renferen eta Euskotrenen zerbitzuen arteko intermodalitatea eta gainerako tokiko garraio publikoekiko intermodalitatea erraztuko duen pasabidearen proiektua idatz eta egikari dadin.
Lanen guztizko kostua 7,7 milioi eurokoa izango da (gehi BEZa), eta honela finantzatuko da: Eusko Jaurlaritzak % 22,22 jarriko du, ADIFek % 33,33 eta Irungo Udalak % 44,45.
ETSri mandatua, Arkautiko gurutzegunearen inguruan
Bestalde, Gobernu Kontseiluak Mugikortasun Jasangarriaren sailburuari baimena eman dio bere Sailak mendeko Euskal Trenbide Sarea erakunde publikoari egin diezaion Euskal Y-aren Arkautiko (Araba) gurutzaguneko obretarako eraikuntza-proiektua idazteko mandatua.
Urrats hori behar-beharrezkoa da, ADIFek lan horiek Eusko Jaurlaritzari agindu ostean; izatez, Euskal Autonomia Erkidegoko erakunde publikoak eraikuntza-proiektua lizitatu aurretiko urratsa da. Azpiegiturak 10,7 kilometro izango ditu, eta 146,33 milioi euroko (BEZik gabe) aurrekontua proiektua idazteko eta, ondoren, eraikitzeko.
