Martxoaren 10ean eta 11n, Eusko Jaurlaritzako Hezkuntza sailburu Begoña Pedrosak hainbat topaketatan parte hartuko du University College London (UCL) erakundearen Center of Educational Leadership delakoan.
Eskola-lidergoaren euskal ereduak UCLren interesa piztu du. Hezkuntza sailburua, Begoña Pedrosa, Londresen da University College Londoneko (UCL) Center of Educational Leadership zentroan hezkuntza lidergoan, irakaskuntza prestakuntzan eta ikastetxeetako zuzendaritzan adituak diren bi jardunalditan parte hartzeko. Saio horietan, sailburuak euskal lidergo pedagogikoaren eredua aurkeztuko du, egonkortasunean, profesionalizazioan eta zuzendaritza-taldeen arteko lankidetzan oinarritua. Era berean, Euskadin hezkuntza hobetzen jarraitzea ahalbidetuko duten estrategia berritzaileak aztertuko ditu.
Londresetik, sailburuak hezkuntza-lidergoak eraldaketarako motor gisa duen garrantzia azpimarratu du: «Hezkuntza-lidergoa ez da administrazio-kudeaketara mugatzen, ikuspegi pedagogikoa, etengabeko hobekuntzarekiko konpromisoa eta ikasle guztien arrakasta akademikoa eta berrikuntzarako gaitasuna eskatzen ditu. Bidaia honek aukera paregabea ematen digu zuzendaritza-taldeek ikastetxeetan aldaketaren bultzatzaile gisa duten zeregina indartzen jarraitzeko, nazioarteko adituekin esperientziak trukatzeko eta hezkuntza-lidergoaren euskal ereduaren proiekzioa sendotzeko «.
Egonkortasunean eta etengabeko hobekuntzan oinarritutako lidergo-eredua
Eusko Jaurlaritzak zuzendaritza-talde egonkorrak eta oso prestatuak sendotzeko egin duen apustuak ekimen zehatzak ekarri ditu, hala nola 2023an abian jarritako eskola publikoko zuzendaritza-taldeen hautaketa-plan integrala eta prestakuntza eta ebaluazio-eredu formatiboa, besteak beste. «Gaur egun, Euskadiko zuzendaritza-taldeen % 87k bere egonkortasunari eusten dio, eta datu horrek indartu egiten du bere funtzioaren profesionalizazioarekin dugun konpromisoa eta hezkuntza-sistemaren bilakaeran duen funtsezko zeregina», adierazi du sailburuak.
Hezkuntza-lidergoaren euskal eredua zuzendaritza-taldeen hasierako prestakuntza-eredu sendo batean oinarritzen da, bai eta etengabeko hobekuntza helburu duen ebaluazio-eredu batean ere (Zuzendaritzen konpetentzien urteroko ebaluazioa, mentoringa, kontrasteak…). Eredu horren ezaugarria da inplikatutako eragile guztien sareko lankidetza: zuzendari seniorren, ikuskaritza-taldearen eta berrikuntza-zentroko laguntzaileen artekoa. Lan-sistema horri esker, laguntza egituratu eta eraginkorra ematen zaie eskola-zuzendaritzei, zuzendaritza-talde osoaren garrantzia azpimarratuz, haien garapen profesionala eta hezkuntza-arrakasta bultzatzeko gaitasuna erraztuz. UCLk metodologia hori elementu bereizle gisa identifikatu du, eskola-kudeaketaren etengabeko hobekuntza eta eraginkortasuna bultzatzen baititu.
Euskadik hezkuntza-lidergoa indartu du nazioartean
University College Londonera egindako bidaia beste urrats bat da Hezkuntza Sailak hezkuntza-sistema sendo, berritzaile eta etorkizuneko erronketarako prestatua finkatzeko duen estrategian. Sailburuak nabarmendu duenez: «Gure lehentasuna ikastetxeetan lidergo pedagogikoa indartzea da, ekitatea eta bizikidetza etengabe hobetzea sustatuz. Horrela bakarrik bermatuko dugu ikasle guztien beharrei erantzungo dien eta haien emaitzak hobetzea ahalbidetuko duen hezkuntza-sistema».
Esperientziak trukatzeaz gain, bisita honek atea irekitzen die etorkizunean UCLrekin lankidetzan aritzeko aukerei. Euskal ereduaren sendotasuna eta bere prestakuntza- eta ebaluazio-ereduan duen ikuspegia giltzarri gisa baloratu dira hezkuntza-sistema eraginkorrago eta bidezkoago baterantz aurrera egiteko.
Programa
Astelehena, martxoak 10
09.30 Ingalaterrako eskola sistemaren hastapenak.
10.00 Euskal eskola-sistemarako sarrera eta lehentasun politiko giltzarriak.
11.30 «The Golden Thread», Ingalaterrako irakasleen eta eskola-liderren garapen profesionala.
12.00 Tutoretza eta garapen profesionala irakasleentzat Ingalaterran karrera hastean.
14.30 CELen lidergo eraginkorra, printzipioak eta ikuspegiak garatzea.
15.30 Lidergoko lanbide-kualifikazio nazionalak Ingalaterran.
Martxoak 11, asteartea
09.00 Zergatik da garrantzitsua eskoletako lidergoa eta zer dakigu eskola-lidergo arrakastatsuari buruz?
10.30 Wandle Teaching School Hub irakaskuntza-zentrora bisita.
15.00 Eztabaida, hausnarketak, etorkizuneko lankidetzarako aukerak.
16.30 Amaiera.
