- Bi erakundeek programa pilotu bat garatu dute erakundeetan kontziliazioaren arloko indarguneak eta hobekuntza-arloak identifikatzeko
- Igande honetan, hilak 23, Erantzunkidetasunaren eta Kontziliazioaren Eguna ospatuko da
Emakundek eta Konfekoopek -Euskadiko Kooperatiben Konfederazioak- azken hilabeteetan bultzatu duten «Enpresa kooperatiboa: kontziliazio erantzukidea eta zaintzak» programa pilotuaren lehen ondorioak jakinarazi dituzte.
Proiektu honen abiapuntua hasierako diagnostiko bat egitea eta gidaritza bat aktibatzea zen, erantzunkidetasunaren eta zaintzaren eremu teorikoari erantzun praktiko bat emateko kooperatibisten munduan, zainketa-lanen banaketa desorekatuak emakumeen eta gizonen arteko berdintasunean eragin negatiboa duela aitortuz, eta horrek aukera-kostua ekar diezaiekeela emakumeei enpleguaren eremuan.
Euskadiko enpresa-sarearen ezaugarriak eta kooperatibismoaren garrantzia kontuan hartuta, eredu hori lan hori egiteko ingurune garrantzitsu gisa identifikatu zen.
Kooperatiba askok ordutegi malgua edo telelana bezalako neurriak zituztela egiaztatu ondoren, hauek izaera berritzailerik ez zutela ondorioztatu zen, kontziliazioaren kontzeptua adin txikikoen zaintzara mugatzen zela gaineratuz, nagusien zaintza edo autozainketari heldu gabe.
Diagnostiko horrekin, tamaina, sektore eta tipologia desberdineko EAEko hainbat kooperatibak hiru faseko ibilbide batean parte hartu dute, Emakunderen eta Konfekoop-en arteko lankidetzaren esparruan, zaintzak erantzukidetasunaren bidez balioesteko, eta zainketa-lanen banaketa erantzukidea enpresa kooperatiboaren kudeaketa-ereduan sartzeko.
Sentsibilizazio- eta prestakuntza-faseak eta sistematizazio-faseak gainditu ondoren, indarguneak eta hobetzeko arloak identifikatu ahal izan dira, hala nola erakundeetan erantzunkidetasunari buruzko prozesuak bultzatzea, berdintasuna soilik ardatz duten ekimenekin egiten den bezala. Enpresa batzuk ere ez dira kontziliazioaren arloan dituzten indarguneez jabetzen, hedapen faltagatik, eta batzuetan egokitzapen txikiek kontziliaziorako giro ona ekar dezakete.
Proiektu pilotu hori amaitzeko, azken sozializazio-fase bat egingo da. Fase horretan, parte hartzen duten kooperatibek, beren testigantzen bidez, protagonismoa hartuko dute zainketen banaketa bidezkoagoa lortzeko bidean.
