Nerabeen arteko talentu-lehiaketa bat, telebista-estilo garbienean. Barakaldoko Udaleko Gazteria Sailak, Giltzarri zerbitzuaren bitartez, Zu Bai Artista antolatu du 12 eta 18 urte bitarteko gazteentzat. Ekitaldia maiatzaren 9an izango da, 18:00etan, Gurutzetako zentro zibikoan, eta parte hartzeko izena emateko epea apirilaren 16ra arte zabalik egongo da.
«Sarritan nerabeen kolektiboa ikusezin bihurtzen du gizarteak, ekimenik gabekotzat eta parte-hartze gutxikotzat hartzen da. Hala ere, Gazteria Zerbitzuan badakigu nerabeak pertsona sortzaileak, aktiboak eta gizartean ekarpen handia egiten dutenak direla. Horren erakusgarri da urtero Barakaldoko 40 neska-mutilek baino gehiagok osatzen dituztela Giltzarriko gazte-taldeak, eta hainbat arte eta sormen diziplina aztertzen dituztela, dantza, musika, sorkuntza digitala, antzerkia edo eskulanak, besteak beste «, azaldu du Jonathan Martin Gazteria zinegotziak. «Orain, diziplina horietan duten talentua erakusteko aukera emango diegu, balioa emateko», adierazi du.
Lehiaketa honen helburua nerabeen ahalmen artistikoak eta eszenikoak indartzea eta ikusaraztea da, baita talde-lana, sorkuntza kolektiboa eta gazteen parte-hartzea sustatzea ere.
500 Euro Saritan
Datorren maiatzaren 9an proposamen artistikoen entzunaldia egingo da. Proposamen horiek hainbat kategoria eszenikotan zentratu daitezke, formatu librekoak eta gehienez 3 minutuko iraupena dutenak. Epaimahaia hainbat arte- eta hezkuntza-eremutako gazteek osatuko dute, eta, besteak beste, kalitate artistikoko eta interpretazioko irizpideak, erabilera eszenikoa, originaltasuna, balioak dituzten mezuak edo euskararen erabilera aztertuko dituzte.
Gazteria Zerbitzuak 500 euroko txartelak emango ditu, jarduera onenen prestakuntza artistikoari laguntzeko, materiala erosiz edo hainbat arte-diziplinatan ikastaroak eginez. Sariak honela banatuko dira: 250 euro lehen postuari, 150 euro bigarrenari eta 100 euro hirugarren postuari. Taldean zein banaka parte har daiteke.
«Uste dut ekimen hau gazteek beraiek proposatutakoa dela, dibertigarria, deigarria eta gazteen artean interesa piztu dezakeena. Horregatik animatu nahi ditut denak parte hartzera, aukera ezin hobea baita arratsalde dibertigarri bat pasatzeko, talentua erakusteko eta antzeko gustu artistikoak dituzten pertsona berriak ezagutzeko «, esan du Martinek.
Apirilaren 9tik aurrera ikuskizuna topalekuetan ikusteko gonbidapenak
Ikuskizuna gehienez 250 pertsonak gozatu ahal izango dute, Gurutzetako zentro zibiko ekitaldi-aretoan. Bertara joateko, beharrezkoa izango da gonbidapena izatea, erabat doakoak baitira, eta apirilaren 9tik aurrera jaso ahal izango dira Barakaldoko topalekuetan: Gurutzetan eta Barakaldon (CIS-en).
