Mikel Torres Lehendakariorde eta Ekonomia, Lan eta Enplegu sailburuak nabarmendu du azken urteotan enplegu, prestakuntza eta inklusio planak bultzatu direla hiri armaginean langabezia murrizteko, eta lana aurkitzeko zailtasun gehien dituztenekin bere sailak duen konpromisoa berretsi du
Ekonomia, Lan eta Enplegu Sailak, Lanbideren bitartez, langabeziaren egoera aztertzeko azterlan diagnostiko bat finantzatuko du Eibarren, langabezia tasa murriztea ahalbidetuko duten enplegu politika publikoak garatzeko.
Eusko Jaurlaritzak eta Eibarko Udalak beharrezkotzat jotzen dute «arazo horri zorroztasunez heltzea, udalerri horretan langabezian dauden pertsonen enplegagarritasun handiagoa lortzeko ekintza zehatzak diseinatzeko», nabarmendu du Mikel Torres Lehendakariorde eta Ekonomia, Lan eta Enplegu sailburuak.
Azterlan hori gizarte eragileen, enpresen eta hirugarren sektoreko erakundeen parte hartzearekin egingo da, eta Eibarren enplegu politika espezifikoak aplikatzeko aukera emango duen diagnostiko bat eskainiko du, haien idiosinkrasia eta tokiko beharrak kontuan hartuta. Mikel Torres Lehendakariordeak udalerriaren egoera eta beharrak aztertu ditu ostiral honetan, Alfonso Gurpegui Enplegu eta Inklusio sailburuordearekin, Francisco Pedraza Lanbideko zuzendariarekin, Jon Iraola Eibarko alkatearekin eta Vanesa Hortas Ekonomiaren Garapen, Enplegu eta Berrikuntzako zinegotziarekin batera.
Hiri armagineko Alkatetzan egindako bileraren ondoren, Lanbidek epe laburrean lizitatuko du diagnostikorako kontratua, azterlana datozen asteetan abian jartzeko. Analisiak arazoaren aurrekariak eta testuingurua, enplegu politikak, garatutako orientazio eta ekintzailetza ekintzak jaso beharko ditu, eta Eibarko langabeen profilen txosten bat izango du, profil akademikoa edo lan profila bezalako aldagaiak kontuan hartuta.
Zentzu horretan, tokiko eta eskualdeko lan merkatua eta enplegu eskatzaileen profilak ondo ezagutzeko beharra nabarmendu du Torresek , izan ere, «gure enplegu eta inklusio eredua ibilbide pertsonalizatuetan oinarritzen da. Ez du balio formula berak guztientzat. Pertsona batzuek laguntza puntuala baino ez dute behar lana aurkitzeko, eta beste batzuek, berriz, prozesu biziagoa behar dute, lan merkatutik urrunago daudelako, prestakuntza mugatua dutelako, langabezian denbora asko daramatelako edo beste baldintza pertsonal eta sozial batzuk dituztelako».
Azterlanak honako hauek ere aztertu beharko ditu: langabezia, Eibarren okupatutako pertsonen profila, baita udalerritik kanpo okupatutako pertsonena ere. Diagnostikoa amaitu ondoren –aurten bertan prest egotea aurreikusten da–, laburpen exekutiboa eta ondorioak aurkeztuko dira jardunaldi batean.
Laneratzeko tresnak
Baina Torres Lehendakariordeak nabarmendu du Eibarren laneratzearen inguruko kezka ez dela soilik oraingoa. Azken urteotan, Ekonomia, Lan eta Enplegu Sailak eta Lanbidek abian jarri dituzte hainbat ‘Prestakuntza jarduera’, «Enplegua sustatzeko programak’ eta ‘Inklusio programak’.
Lanbidek Euskadiko toki-erakundeei zuzendutako enplegua sustatzeko hiru programa jarri ditu abian 2024an, 32,6 milioi euroko aurrekontuarekin:
- Enplegua sustatzeko tokiko ekintzen programa, lurraldearen garapen sozioekonomikoan eta modernizazioan eragina izango duten enplegua sortzeko.
- Toki erakundeek gazteak kontratatzeko laguntza programa.
- Gazte langabeak kontratatzeko Lehen Esperientzien programa Administrazio Publikoan.
Horri esker, 2.472 kontratazio finantzatu ahal izan dira, horietatik 1.657 toki erakundeek zuzenean eta 815 tokiko enpresek zuzenean kontratu mugagabeak egiteko. Esparru horretan, Eibarko Udalak 269.900 euro jaso zituen, eta 32 kontratu finantzatu zituen tokiko enpresetan, 13 emakumeen kolektiboan eta 19 gizonentzat.
32,6 milioi euroko aurrekontuarekin, 2025ean, Euskadiko toki erakundeei berariaz zuzendutako enplegua sustatzeko bi programa hauetarako deialdia egingo da berriro:
- Enplegua sustatzeko tokiko ekintzen programa, Lanbide – Euskal Enplegu Zerbitzuan izena emanda dauden langabeen enplegagarritasuna hobetzeko.
- Toki erakundeek gazteak kontratatzeko laguntzen programa (izapidetzen).
Baina, gainera, Debabarrena Debemengo landa garapeneko elkarteak –Eibar, Elgoibar, Deba, Mutriku, Mendaro eta Soraluze udalerriek osatua– Inklusio Zerbitzuaren deialdiarekin bat egin du, «Debabarreneko udalerrietako landa eremuak edertzea eta hobetzea eta natura inguruneak kontserbatzea» proiektua bultzatzeko.
Proiektu horren oinarria ‘Lehentasunezko arretako kolektiboentzako, 45 urtetik gorako langabetuentzako eta egoera zaurgarrian edo baztertuta geratzeko arriskuan dauden pertsonentzako enplegu-proiektu integralak’ izeneko laguntza lerroa da. Horretarako, banakako ibilbideak garatzen dira, lan orientazioa, prestakuntza eta enplegua sortzea konbinatzen dituztenak. 2023-24ko deialdian 134.840 euroko dirulaguntza eman zen, eta 2024-25ean, berriz, 136.920 eurokoa.
Mikel Torres Lehendakariordeak azaldu duenez, «45 urte baino gehiago dituztenekin, langabezian daudenekin, emakumeekin, gazteekin eta lana aurkitzeko zailtasun gehien dituztenekin konpromiso espezifikoa dugu. Izan ere, Euskadin ez dago inor soberan, eta ez dugu inor atzean utziko sexua, arraza edo adina direla eta».