Euskal Finantza Aliantzaren finantza-gaitasuna handitzeko hasierako bultzada emateko Finantzen Euskal Instituturako (FEI) 1.000 M €-ko zuzkidura izapidetze-fasean sartzear dago eta apirila amaitu baino lehen iritsiko da Legebiltzarrera.
Horixe da Noël d’Anjou Ogasun eta Finantzetako sailburuak Ekonomia Berriaren Foroan izandako agerraldian gaur Bilbon egin duen iragarpenetako bat. Zehaztu duenez, “une honetan badugu nahitaezko txostenen mende jartzen ari den lege-aurreproiektu bat egina, eta Gobernu Kontseiluari helaraziko diogu, onar dezan”. Ondoren, Legebiltzarrera bidaliko da.
Ehun bat lagunen aurrean, d’Anjouk Aliantza horren egoera zehaztu du. Aliantzaren protokoloa joan den martxoaren 3an sinatu zuten Eusko Jaurlaritzak eta bederatzi erakundek.
“Oinarri teknologikoa duen industria berria, enpresa erreferenteen errotzea, haien dimentsio handiagoa eta atzerriko inbertsio berriak erakartzen laguntzea bultzatu nahi da tresna publiko-pribatuen bidez”, azpimarratu du, 2024ko uztailean Gobernu Programan jasotako konpromisoetako bati helduz, “Euskadiren finantza gaitasunak lerrokatzeko eta ardazteko helburua betetzea, Euskal Funts handia osatzeko”.
“Hain agertoki lehiakor eta globalean indarrak batzeko” dinamika horretan Ogasun eta Finantzetako sailburuak euskal ekonomiaren garapena eta hazkundea finantzatzea ahalbidetuko duten inbertsioetarako finantza-tresna berriak aktibatzeko beharra aipatu du. “Adibidez, lehen aldiz 30.800 milioi euroko ondarea gainditu duten BGAEez ari gara. Kopuru horrek EAEko BPGaren heren bat hartzen du”, nabarmendu du.
“Eusko Jaurlaritza da plan horiek arautzen dituena, eta, beraz, haien indarra eta segurtasuna zaintzea dagokigu”, nabarmendu du d’Anjouk, eta adierazi du Eusko Jaurlaritzak araudia aldatzeko asmoa duela, “BGAEen interesak Euskal Finantza Aliantzaren esparruan garatu beharreko ekimenekin lerrokatu ahal izateko”.
Ogasun eta Finantzetako sailburuak gaur egindako beste iragarpen bat Ekonomia Itunaren Batzorde Mistoaren (EIBM) hurrengo bilera da (“Ministerioarekin izandako elkarrizketen aurrerapena ikusita, Aste Santua baino lehen egitea aurreikusten da”), aurre-akordioa formalizatzeko, araubide erkideko autonomia-erkidegoei zorra kentzeko aukerak kupoaren kalkuluan eraginik izan ez dezan.
Euskadiren autogobernu ekonomiko-finantzarioaren defentsa eta haren gaitasunen egokitzapena eta indartzea ere Ekonomia Berria Forumeko esku-hartzearen gai nagusiak izan dira. Atal horretan, EIBMn azken hilabeteetan lortutako 30 akordioak nabarmendu ditu.
Pakete itxi horretatik, d’Anjouk aipamen berezia egin dio euskal erakundeek zerga arloko nazioarteko foroetan goi mailako taldeetan parte hartzea ahalbidetuko duen akordioari. “Garrantzi politiko handia du, euskal Ogasuna de facto Europan aitortzen dela erakusten duelako. Horrek esan nahi du Europan 31 ogasun daudela, estatu kideei dagozkien 27ak eta foru-ogasunei dagozkien 4ak”.
