Etxebizitza eta Hiri Agenda Sailak Next Generation EB funtseko 92 milioi euro exekutatu ditu eraikinak birgaitzeko eta hauen energia-efizientzia hobetzeko

0

Astearte honetan egindako Gobernu Kontseiluan, Eusko Jaurlaritzak baimena eman dio Etxebizitza eta Hiri Agenda Sailari 2025eko aurrekontutik 92,3 milioi euroko gastua egiteko (bizitegi-eraikinak eta etxebizitzak birgaitzeko laguntza-programetara bideratua), energia-efizientzia sustatzeko helburuarekin.

Partida horrek ez dakar beste laguntza-deialdi bat egitea, ezta programa zabaltzea ere; eta aukera ematen du Espainiako Gobernuaren Berreskuratze, Eraldaketa eta Erresilientzia Planarekin lotuta dagoeneko eman diren eta gauzatzen ari diren dirulaguntzen gastuari aurre egiteko.

Laguntzak —2022ko ekainaren 21eko Aginduak arautuak eta 853/2021 Errege Dekretuaren 3., 4. eta 5. programetan jasoak— Europar Batasunak NextGeneration EU funtsen bidez finantzatutako Suspertze, Eraldatze eta Erresilientzia Planaren parte dira. Funts horiek jasotzen hasi zirenetik, Euskadik 107,2 milioi euro jaso ditu guztira, eta horiei Eusko Jaurlaritzak emandako 60 milioiak gehituta, 20.000 etxebizitza baino gehiago birgaitzea ahalbidetu da, 4.700 espedientetan banatuta. Horietatik, 1.000 jabeen erkidegoetakoak dira (eraikinak), eta gainerako 3.700 etxebizitzak, banakakoak.

Gainera, 167,2 milioi euro horien zati batekin, Eusko Jaurlaritza 3.800 espediente gehigarrirekin ari da lanean. Espediente horien onuradunak pertsona kalteberak dira, eta laguntza pertsonalizatuak jasotzen dituzte, erkidegokoez gain.

Horrela, Gobernu Kontseiluaren erabakiak aurrekontu-estaldura bermatzen du, onuradunek beren eraikin eta etxebizitzetan energia-birgaitze proiektuak gauzatzen jarrai dezaten. Laguntza horiek funtsezkoak dira EAEko higiezinen parkearen energia-efizientzia hobetzeko, energia-kontsumoa murrizteko eta bizitegi-sektorearen deskarbonizazioan aurrera egiteko.