Eusko Jaurlaritzak itsasertzaren kudeaketa bere gain hartuko du gaurtik aurrera. 246 kilometro, ur eta kosta, Cobarón lurmuturretik, Bizkaiko mendebaldeko mugan, Bidasoa ibaiak Gipuzkoa eta Lapurdi artean duen banalerroraino.
Amaia Barredo Elikadura, Landa Garapen, Nekazaritza eta Arrantza sailburuak prentsaurrekoan azaldu duenez, «euskal itsasertzaren garapenak industria jasangarri berriak sortzea ahalbidetu behar du, Europar Batasunak zehaztutako ildotik, ekonomia urdin berria bultzatuz eta Euskadi globalaren garapena babestuz».
Besteak beste, Eusko Jaurlaritzak kudeatuko ditu:
- intentsitate-, arrisku- edo errentagarritasun-jarduera bereziak, hala nola dragatzeak eta agregakinak ateratzeak.
- instalazio desmuntagarriei dagokien okupazioaren kontrola, hala nola kafetegi, izozki- edo ur-postu eta tabernak
- itsasorako igarobide eta sarbide-zortasuneko zonak, edo
- hondartza-denboraldirako baimenak.
Sailburuak azaldu duenez, 14 lanpostu eskualdatuko dira Euskadira. 10 funtzionario eta 4 lan-kontratudun, Eusko Jaurlaritzaren bulegoetan arituko direnak.
Gobernu Kontseiluak Gardentasunaren Lege-aurreproiektua onartu du
Gobernu Kontseiluak Euskadiko Gardentasunaren Legearen aurreproiektua onartu du gaur. Eusko Jaurlaritzako bozeramaile eta Gobernantza, Administrazio Digital eta Autogobernuko sailburuak azaldu duenez, lege-testu honek politika publikoen gardentasuna bermatzeko tresna bat gehiago izan nahi du.
Ubarretxena sailburuak adierazi du Legeak hiru helburu nagusi dituela:
- Administrazioaren gardentasunean sakontzea.
- Lankidetzazko gobernantza eta herritarren parte-hartzea bultzatzea; beti ere helburu hartuta herritarrentzako eztabaidarako eta parte-hartze eraginkorrerako espazioak sortzea.
- Eta informaziorako eskubidea eta sarbidea erraztea; eta baita Gobernu-programan jasotako ekintzen eta ekimenen kontu-emate eta jarraipena erraztea ere.
Legeak Gardena-Gardentasunaren Euskal Agintaritza sortzea jasotzen du. “Organo independentea izango da – zehaztu du Ubarretxenak- eta bermatuko du Administrazio Publikoak publizitate aktiboaren eta informazioa eskuratzeko eskubidearen arloko obligazioak betetzen dituela”.
Lege-proiektuak, gainera, publizitate aktiboko betebehar handiagoak jasotzen ditu. Eta araubide zigortzaile bat aurreikusten du, gardentasunaren arloko arau-hausteak gertatzen diren kasuetarako.
Gaur egun, Jaurlaritzak sei atari ditu gardentasuna, informaziorako sarbidea eta Gobernuaren ekimenaren jarraipena bermatzeko. Alegia: Gardena, Irekia, Euskadi.eus, Open Data, Legegunea eta kontratazio publikoko plataforma.
Halaber, Euskadik organo independenteak ere baditu, hala nola Etika Publikoaren Batzordea eta Arau-hausteen Berri Emateko eta Informatzaileak Babesteko Barne Sistema. Horien eginkizuna da erakunde publikoetan printzipio etikoak eta gobernu onari dagozkion printzipioak betetzen direla zaintzea eta gardentasuna eta herritarren informaziorako sarbidea bermatzea.
Sailburuaren hitzetan, “gaur onartutako lege-proiektu hau beste urrats bat da gardentasunaren eta herritarren parte-hartzearen politikak bultzatzeko; eta erakundeak indartzeko eta demokrazia sendotzeko Jaurlaritzak bultzatu nahi duen esparru juridiko berriaren baitan kokatzen da”.
28 milioi euro, Gauzatu Industria programarako
Gaurko gobernu-kontseiluan, Gauzatu Industria programa onartu da, 28 milioi euroko zuzkidura duena.
Bozeramaileak azaldu du, programa horren helburua dela oinarri teknologiko eta berritzailea duten enpresa txiki eta ertainen sorrera eta garapena bultzatzea.
Gauzatu programan sar daitezke erauzketa-, eraldaketa-, ekoizpen- eta zerbitzu-industriako enpresa txiki eta ertainak. Oinarri teknologikoa eta berritzailea izan behar duten enpresak. Programari atxiki ahal izango zaizkio, baita ere, industria-enpresen kontrako zibererasoen aurrean babesteko sistemekin lotutako jarduera nagusia duten enpresek.
92,3 milioi euro, eraikinak birgaitzeko laguntza-programak finantzatzeko
Gobernu Kontseiluak 92,3 milioi euroko gastua egiteko baimena eman du, bizitegi-eraikinak eta etxebizitzak birgaitzeko laguntza-programak finantzatzeko.
Prentsaurrekoan bozeramaileak azaldu duenez, diru-partida hau 2025eko aurrekontuetatik dator eta, hari esker, dagoeneko eman diren eta gauzatzen ari diren dirulaguntzetatik ordaintzeko dagoen gastuari aurre egingo dio Etxebizitza Sailak.
Horrela, aurrekontu-estaldura bermatzen zaiei onuradunei, beren eraikin eta etxebizitzetan birgaitze energetikoko proiektuak gauzatzen jarraitu dezaten.
“Laguntza horiek – azpimarratu du Maria Ubarretxenak- funtsezkoak dira Euskadiko higiezinen parkearen energia-efizientzia hobetzeko, energia-kontsumoa murrizteko eta bizitegi-sektorearen deskarbonizazioan aurrera egiteko”. Guztira, eta 2024aren amaierara arte, 69 milioi euro baino gehiago exekutatu dira.
4,2 milioi euro mahastien uzta berderako laguntza-programarako
Gobernu Kontseiluak 4,2 milioi euro onartu ditu mahastientzako uzta berderako laguntza-programaren deialdirako.
Ekimen hori Nekazaritza Politika Bateratuaren Plan Estrategikoaren baitan kokatzen da eta mahastizainei ardogintzarako mahatsaren ekoizpenaren kudeaketan laguntzea du helburu.
Kontsumobideren laguntzak
Gobernu Kontseiluak Kontsumobideren laguntza-deialdi bat onartu du, kontsumitzaileak eta erabiltzaileak defendatzen eta babesten dituzten elkarteei eta entitateei begira.
Bozeramaileak azaldu du, deialdi honetan araututako laguntzak finantzatzeko diru-kopurua 505.820 eurokoa dela guztira, hau da, aurreko deialdian baino % 5 gehiago.
Ildo beretik, Lehiaren Euskal Agintaritzak eta Kontsumobidek beste lau urtez luzatuko dute bi erakundeek sinatutako hitzarmena. Hitzarmen honen helburua da kontsumitzaileen eta erabiltzaileen eskubideak babestea. Gobernu Kontseiluak lankidetza-esparru hori luzatzeko baimena eman du, bi erakundeen arteko sinergiak aprobetxatzen jarraitzeko.
