Gobernu Kontseiluak oniritzia eman dio Amaia Barredo Elikadura, Landa Garapen, Nekazaritza eta Arrantzako sailburuaren aginduari, 2024-2027 Mahastizaintza eta Ardogintzako Esku-hartze Sektorialaren barruan “mahats berdearen uztarako laguntzak” emateko deialdia egiteko. Ekimena Nekazaritza Politika Bateratuaren Plan Estrategikoaren barruan dago, eta mahastizainei ardogintzarako mahats-produkzioaren kudeaketan laguntzen die.
Amaia Barredok azpimarratu duenez, “Eusko Jaurlaritzak mahastizaintza eta ardogintzako sektorearekin duen konpromiso irmoari eusten dio, mahastizainekin eta nekazaritza-organizazioekin lankidetza estuan lan eginez, haien beharrei erantzungo dieten politikak garatzeko. Ildo horretatik, aurreko ekitaldietan jarraitutako irizpidearekin bat eginez, mahatsaren batez besteko prezioaren kalkuluak 2017ko, 2018ko eta 2019ko uzten batez besteko balioak eta errendimenduak hartuko ditu kontuan, sektorearen adierazgarri ez diren beste kanpaina batzuen inpaktu negatiboa saihesteko“.
Ondorioz, 2025erako KPIa eguneratuta, hektareako 5.850 kiloko gehieneko errendimenduarekin eta hektareako 3.800 euro inguruko gehieneko primarekin. Elikadura, Landa Garapen, Nekazaritza eta Arrantza Sailak guztira 4.290.000 euro bideratu ditu operazio honetara.
Eskaerak
Eskaerak aurkezteko epea 2025eko apirilaren 4tik 29ra arte egongo da zabalik. Elektronikoki aurkeztu beharko dira foru-aldundien plataformen bidez, ziurtagiri digitalaren edo baimendutako ordezkaritza baten bidez.
Euskal Autonomia Erkidegoaren lurralde barruan ardogintzarako mahatsa produzitzeko mahastiak dituzten mahastizainek jaso ahal izango dituzte laguntza hauek. Eskatzaileek araudi erregulatzailean ezarritako baldintzak bete beharko dituzte, eta dagokien dokumentazioa aurkeztu Arabako, Bizkaiko eta Gipuzkoako foru-aldundien kanal elektronikoen bidez.
Laguntzak emateko prozedurak norgehiagoka-araubideari jarraituko dio, mahats tipologiari eta mahastiaren adinari erreparatuta, eta mahastizain gazteak genero-ikuspegitik ere kontuan hartuta.
Ezabatzea
“Uzta berde” gisa hartzen da heldu gabeko mahats-mordoak erabat kentzea, dagokion partzelan errendimendu nulua bermatuta. Laguntza emango zaie ardogintzarako mahatsa produzitzeko erabiltzen diren Euskadiko mahastiei.
Aurkeztu beharreko dokumentuen artean daude eskatzailearen identifikazioa, mahastizaintzako ustiategiaren datuak, dagozkion partzelei buruzko informazioa, erantzukizunpeko adierazpena eta, laguntzaren onuradun izanez gero, hartutako konpromisoak.
Laguntza hauek emateari buruzko ebazpenak 2025eko ekainaren 30a baino lehen jakinaraziko zaizkie eskatzaileei. Ondoren, 10 eguneko epea izango dute laguntzari borondatez uko egiteko, eta 2025eko uztailaren 15a izango da laguntza ordaintzea eskatzeko muga-eguna.
Laguntzaren onuradunek berdean egin beharko dute uzta, eta 2025eko uztailaren 15a baino lehen anduietako mahats-mordoak kendu beharko dituzte, mahastiak baldintza begetatibo eta sanitario egokietan mantenduta eta dagozkion ikuskapenak eta kontrol administratiboak erraztuta.
