Lehen Hezkuntzako 2. mailako ikasleen irakurketa-errendimendua ebaluatzeko aukera ematen duen proiektu honek, iaz hasitakoak, bikoiztu egin du bere ezarpena, irakasleentzat oso erabilgarria delako.
Hezkuntza Ebaluatu eta Ikertzeko Erakundeak Berritzegune Nagusiarekin lankidetzan diseinatutako tresna hau Hezkuntza Sailaren hezkuntza-hobekuntzarako planteamenduaren barruan kokatzen da.
Irakurtzeko trebetasuna neurtzeko Hezkuntza Sailaren tresna (ITT) sendotu egin da ezarritako lehen urtean. Erabilera bikoiztu egin da: Euskadiko 335 ikastetxeek erabiltzen dute, 11.905 ikasleri aplikatu zaie eta, beraz, % 240ra igo da bere erabilera.
Proiektu honek Lehen Hezkuntzako 2. mailako ikasleen irakurketa-errendimendua modu erraz eta praktikoan ebaluatzeko aukera ematen du, eta Hezkuntza Sailaren hezkuntza-hobekuntzarako planteamenduaren barruan kokatzen da. Tresna hau Irakas Sistema Ebaluatu eta Ikertzeko Erakundeak diseinatu du, Berritzegune Nagusiarekin lankidetzan (Prestakuntzan eta Hezkuntzaren Berrikuntzan Laguntzeko Zentroa). 2023-2024 ikasturteaz geroztik egin dira lehen esku hartze espezializatuak, ebaluazioaren emaitza izan direnak, eta ikastetxeei tresna eskaini zaie dagoeneko.
Irakasleek ikasleei egin ahal dieten banakako proba da, eta bi zatitan egiten da. Lehen zatian, ikasleak ozen irakurtzen du testu bat, eta irakasleak intonazioa, abiadura eta irakurketaren zehaztasuna neurtzen ditu. Jarraian, batez ere ulermena ebaluatzeko galdetegi bati erantzun behar diote. Aplikazioak bi proben emaitzak bateratzen ditu, eta grafiko batean erakusten du trebetasun bakoitzaren garapen-maila, ikasle bakoitzaren datuak, ikasgela osoarenak eta ikasturteari dagozkionak eskainita. Horri esker, ikastetxeek informazioa izan dezakete ondorioak ateratzeko eta irakurmena hobetzeko neurriak hartzeko.
Zailtasunak goiz detektatzeko tresna da estrategia honek barne hartzen duen beste baliabideetako bat. Ikasteko zailtasunen detekzio goiztiarrean datza, dauden zailtasunak ezagutu, landu eta prebenitzeko aukera ematen du. Horrela, ikasleen garapen akademikoa eta pertsonala bermatzeko. Hezkuntza Sailak «AGNH/TDAH Ikasteko Zailtasun Espezifikoak eta Identifikazio eta Esku-hartze Goiztiarreko Prozedura» izeneko laguntza-dokumentua garatu du ikastetxeentzat. Bertan, profesionalek ikastetxeetan burutu beharreko faseak, uneak eta zereginak ezartzen dira.
Irakurketa-estrategiaren baliabideak
Irakurtzeko trebetasuna neurtzeko eta zailtasunak garaiz detektatzeko tresnak Euskal Hezkuntza Sistemaren Irakurketa Estrategiaren barruan sartzen dira. Estrategiaren helburu nagusia da ikastetxe batean irakurketaren tratamendua antolatzea eta artikulatzea, irakurle onak eta trebeak prestatzeko.
Ikasleen artean irakurketa indartzeko lan-ildoa ez da berria. Eusko Jaurlaritzako Hezkuntza Sailak Euskadiko hezkuntza-komunitatearen esku jarri zituen, 2018an, ikasleen irakurmena hobetzeko eta irakurtzeko zaletasuna bultzatzeko laguntza-baliabideak. Ikastetxe bakoitzak bere Irakurketa Plana diseinatu zuen bere errealitatetik abiatuta, eta aldian behin egokitu beharko zela aurreikusi zen. Egokitzeko behar horri erantzuten dio estrategia berria eguneratzeak.
Estrategiak barne hartzen dituen proiektu berrien bidez, irakurketa indartzeko tresnak jartzen dira ikastetxeen eskura. Ikastetxeen gobernantzak garrantzia du ikastetxe bakoitzaren irakurketa-helburuen azterketan, egokitzapenean eta ondorengo balorazioan, bai eta esku-hartzerako erabakiak hartzean ere. Esparru honetan parte-hartzea harago doa; familiek ere funtsezko zeregina dute; estrategian familien eta irakasleen arteko lankidetza aipatzen da, baita familiek duten eragin zuzena irakurtzeko motibazioan eta ikasleen familien elkarteek edo inguruko baliabideek, liburutegiek kasu, duten harremana.
