Gobernu Kontseiluak onartu egin du Turismo, Merkataritza eta Kontsumo Sailak, Kontsumobideren bidez, kontsumitzaile eta erabiltzaileen defentsa eta babeserako elkarte eta erakundeentzako dirulaguntzak emateko deialdia, aholkularitza, defentsa eta informazio eginkizunetan laguntzeko.
Laguntzetan bi lerro ezarri dira. Lehenengoa kontsumitzaileei arreta emateko da. Diruz lagunduko dira kontsumitzaileen antolakundeen funtzionamendu orokorretik eratorritako gastuak, kontsumitzaileek aurkezten dituzten kontsultei erantzuteko, erreklamazioak kudeatzeko eta kontsumitzaileei eta erabiltzaileei zuzendutako bitartekaritzak eta prestakuntza- eta informazio-ekintzak egiteko.
«Laguntza juridikoa» izeneko 2. lerroan, diruz lagunduko dira antolakundeek kontsumitzaileei emandako laguntza juridikotik eratorritako gastuak. Horretarako, antolakundeek arreta eskaini behar dute aholkulari juridiko propioak dituzten kontsultategietan eta kontsumitzaile guztiei zuzendutako orientabide juridiko orokorren bidez.
Deialdi honetan araututako laguntzak finantzatzeko baliabide ekonomikoak 505.820 eurokoak dira guztira, hau da, aurreko deialdian baino % 5 gehiago.
Eskabideak aurkezteko epea ebazpena Euskal Herriko Agintaritzaren Aldizkarian argitaratu eta biharamunean hasiko da.
