Mikel Torres Lehendakariorde eta Ekonomia, Lan eta Enplegu sailburuak “justizia soziala” defendatu du Sevillan, “eskubide eta aukera berdintasuna bilatzen duen funtsezko printzipio gisa, jatorria, generoa, arraza, erlijioa edo egoera sozioekonomikoa kontuan hartu gabe, Eusko Jaurlaritzak garatutako politika publikoen bizkarrezur gisa”.
“Trantsizio hirukoitza: lan egokirako, tokiko garapen ekonomikorako eta justizia sozialerako aukerak” goi mailako osoko bilkuran hartu du parte Torresek, Teresa Rivera Europako Batzordeko Trantsizio Garbi, Justu eta Lehiakorrerako presidenteorde exekutiboarekin eta Frantziako, Hegoafrikako eta Somaliako beste goi kargudun batzuekin batera, Andaluziako hiriburuan egiten ari den Tokiko Garapen Ekonomikoaren VI. Mundu Foroaren baitan.
Enpleguaren Euskal Legea nabarmendu du Torres Lehendakariordeak, herritar guztiei aitortzen baitie orientaziorako, prestakuntzarako, aholkularitzarako eta banakako planerako eskubidea, bai eta Diru sarrerak Bermatzeko eta Inklusiorako Euskal Sistemaren Legea ere, pobrezia murrizteko tresna “ezinbestekoa eta eraginkorra” delako, Espainian eta Europan aitzindaria izan baitzen.
Halaber, Torresek azpimarratu du enplegu politika publiko guztiak “lerrokatu, planifikatu eta elkarrekin kudeatzen” dituztela Euskadin tokiko, lurraldeko eta eskualdeko gobernu guztiek, existitzen diren eragile sozial eta ekonomikoen parte hartzearen eskutik.
Bilkuran aztertu da hiriek eta eskualdeek, lanaren esparruko eragileekin, gobernuekin, enplegatzaileekin eta langileen erakundeekin batera, trantsizio hirukoitza balia dezaketela enplegu aukera berriak sortzeko, tokiko garapen ekonomikoa sustatzen duten bitartean. Elkarrizketa baliagarria izan da, halaber, tokiko ekonomiak jasangarritasunaren eta justizia sozialaren helburu globalekin nola lerrokatu daitezkeen sakontzeko.
Ildo horretan, Torresek nabarmendu duenez, “une historiko bat bizi dugu eta, aldi berean, garrantzi handiko hiru trantsizio bizitzen ari dira, gaur egun ezagutzen dugun lan paradigmaren aldaketa aurreikusten dutenak, eragina enpleguan berehalakoa eta irismen luzekoa baita”. Horren aurrean, balizko arriskuez ohartarazi du eta irtenbide batzuk eman ditu. Besteak beste, langile kopurua handitzea, langileen gaitasunak merkatuak eskatzen dituenekin lerrokatzea edo ekonomia berdeago eta lehiakorrago baterantz igarotzea.
ORU-FOGAR bilera
Arratsaldean, Torres Lehendakariordea eta Iñaki Ruiz Ekonomia sailburuordea ORU-FOGAR nazioarteko sarearekin bilduko dira, eskualde arteko lankidetzarako eskualde batuen erakundearekin; zehazki, Rachid El Abdi presidentearekin eta Carles Llorens idazkari nagusiarekin izango dute topaketa.
Ondoren, Torres eta Ruiz foroaren irekiera ekitaldi ofizialean izango dira, Sevillako Diputazioaren egoitza probintzialeko patio enblematikoan, eta María Jesús Montero izango da buru, Espainiako Gobernuko lehen presidenteorde eta Ogasun ministroa.
