Amparo López Merkataritzako estatu-idazkaria eta Javier Hurtado sailburua Gasteizen bildu dira, baterako lan-ekintzak koordinatzeko

0

Javier Hurtado Turismo, Merkataritza eta Kontsumoko sailburua Amparo López Merkataritzako estatu-idazkariarekin bildu da gaur, koordinazio-gaiak aztertzeko eta Europako Funtsen bidez finantzatutako proiekturen bat bisitatzeko. Horretarako, bileraren ondoren, Gasteizko hornidura-merkatura hurbildu dira, Maider Etxebarria alkatearekin batera.

Sailburuak eta alkateak eskertu egin diote Merkataritzako estatu-idazkariari, bertan egotea eta etengabe laguntzea. «Erakundeen arteko lankidetza funtsezkoa da gure sektoreei laguntzen dieten eta gure herritarren bizi-kalitatea hobetzen duten proiektuak garatzeko», adierazi du sailburuak.

Ildo horretan, gogorarazi du Euskadik ia 25 milioi euro jaso dituela merkataritza-arloko Europako funtsetatik. Horietatik 4 baino gehiago zuzenean iritsi dira enpresa eta entitateetara, merkataritza modernizatzeko funts teknologikoaren bidez, eta 20 milioi hiri- eta landa-eremuetako merkatuak hobetzeko eta turismo-eremuetako merkataritza-jarduerarako erabili dira.

Arabak 5,8 milioi jaso ditu, horietatik 3,8 Gasteizek, eta horien zati bat hornidura-merkatuaren proiektura bideratu da. “Espainiako Gobernuaren (kasu honetan, Merkataritzako Estatu Idazkaritza) eta Euskadiren eta haren erakundeen (Gasteizko Udala) artean egin den ezinbesteko lankidetzaren eta koordinazio-lan handiaren adibide bat”, esan du sailburuak amaitzeko.