Maria Ubarretxena Eusko Jaurlaritzako bozeramaile eta Gobernantza, Administrazio Digital eta Autogobernuko sailburua elkarrizketatu dute gaur Radio Popular-Herri Irratian.
Autogobernuari dagokionez, sailburuak nabarmendu du atzokoa egun garrantzitsua izan zela; izan ere, 40 urteren ostean, Euskadik kudeatzen ditu jada bere itsasertzaren 246 kilometrokoak. “Horrek aukera emango digu hainbat kudeaketa bizkortu eta proiektu berriak abiarazteko, itsasertzari lotutako industriaren mesedetan” gaineratu du.
Eskualdatzeke dauden eskumenei dagokienez, Ubarretxenak ziurtatu du Euskadi prest dagoela eskumen guztiak bere gain hartzeko eta kudeatzeko, Gizarte Segurantza barne. «Datorren astean hainbat bilera ditugu ministerio ezberdinekin, esku artean eta aztergai ditugun gaietan aurrera egiteko, besteak beste, Gizarte Segurantzaren kudeaketa ekonomikoan; transferentzia mailakatu bat lantzen ari gara», jakinarazi du sailburuak.
«Une oro saiatzen ari gara euskal agenda Madrilera eramaten, gurea dena defendatzen, horretan datza gure lana, akordioetara iritsi gaitezen» nabarmendu du Ubarretxenak.
Industriaren egungo egoera
335 langileri eragiten dion Bridgestonek iragarritako enplegu-erregulazioko espedientea ere izan du hizpide Ubarretxenak.
Sailburua kezkatuta agertu da, eta Industria saila jada enpresarekin hitz egiten ari dela ziurtatu du. Egungo testuinguru geopolitikoan, Eusko Jaurlaritza etor litekeenari aurre egiteko lanean ari dela baieztatu du Ubarretxenak «Herrialde industriala gara – azpimarratu du Ubarretxenak- horregatik, Jaurlaritzak industria indartzearen aldeko apustua egin du, egungo testuinguruan sor litezkeen aukeretan arreta jarrita”.
