Gaur, apirilak 2, asteazkena, gaixotasun onkologikoak dituzten 5 adingabe euren senideekin iritsiko dira Gazako Zerrendatik Euskadira, Osakidetzan osasun-laguntza jasotzeko. Euskal Osasun Zerbitzuak adingabeetako hiru Gurutzetako Unibertsitate Ospitalean tratatuko ditu, eta beste bi Donostia Unibertsitate Ospitalean.
Kairotik Espainiara 13 adin txikiko —1 eta 13 urte bitartekoak— dakartzan hegazkina Zaragozako aireportu militarrera iritsiko da gaur arratsaldean. Bertatik, 5 Euskadira ekarriko dituzte, euren senideekin batera; horietatik 2, anbulantzia medikalizatuan, Gurutzetako eta Donostiako ospitaleetara, euren egoeraren larritasuna dela eta; bertan, adingabe horiek behar dituzten premiazko zaintza medikoak jasoko dituzte.
Gurutzetako Unibertsitate Ospitaleko eta Donostia Unibertsitate Ospitaleko pediatrek, onkologiako profesionalekin batera, bihar, 5 pazienteen egoera ebaluatuko dute eta bakoitzaren osasun-laguntzak nolakoa izan behar duen planifikatuko dute.
Ebakuazio Medikoaren (MEDEVAC) prozeduraren esparruan —Europako Batzordearen Larrialdiei Erantzuteko Koordinazio Zentroak eta OMEk babestua—, Eusko Jaurlaritzako Osasun Sailak eta Osakidetzak asteak daramatzate lanean Gazako zerrendako haur palestinar horiek — paziente guztiek gaixotasun onkologikoak dituzte— ebakuatzen laguntzeko. Azkenean, gaur egingo da ebakuazio hori.
Estatuko ospitaleetara iritsiko diren 13 pazienteetatik 5 Euskadira helduko dira. Euskadiren elkartasun-keinu bat da, bai adingabe horiek hartzeko, bai haiei osasun-laguntza emateko; erakunde guztiek lankidetzan jardungo dute pertsona horiei arreta eman ahal izateko.
Eusko Jaurlaritzako Osasun Sailak eta Osakidetzak —OMErekin eta Ministerioarekin batera— parte hartzen duten bigarren ebakuazioa da. Iazko uztailaren 25ean, Euskadik Gazatik etorritako osasun-arazo larriak zituzten 9 adingabe eta ama bat hartu eta artatu zituen.
Familiei arreta emateko, haurrek eta hauen senideek irabazi-asmorik gabeko errefuxiatuen aldeko erakundeek kudeatutako baliabideetan hartuko dute ostatu. Erakunde horiek hainbat zerbitzu eta jarduera eskainiko dizkiete harreraren barruan, hala nola ostatua, mantenua eta oinarrizko premien estaldura, baita arreta integrala ere, hau da, informazioa eta orientazioa, laguntza, arreta psikologikoa eta juridikoa, eta itzulpen- eta interpretazio-zerbitzua.
