Martxoan 139 langabe gutxiago zenbatu dituzte eta 108.314 langaberekin itxi da hilabetea

0

Euskadiko enpleguak dinamika onean jarraitzen du, Gizarte Segurantzako afiliazioak gora egin du, kontratazio zifra altua da eta langabeziak behera egin du sektore guztietan, ia adin tarte guztietan, lurralde guztietan eta gizonen zein emakumeen artean.

Martxoan, otsailean baino 139 langabe gutxigo zenbatu ziren (- % 0,13) eta 2024ko martxoan baino 3.157 gutxiago (- % 2,83). Horrela, enpleguaren bilakaera positiboa berretsi da; izan ere, martxo hau ondoz ondoko seigarren hilabetea izan da urte arteko saldo negatiboarekin, eta langabeen kopurua 108.314tan kokatu da.

Jaitsiera hori ez da ohikoa izaten martxoan; izan ere, bilakaera historikoak erakusten digu hilabete aldakorra dela, igoerak eta jaitsierak dituena. Hala ere, aurtengoa azken 17 urteetako bosgarren martxorik onena da (2016, 2017, 2019 eta 2023koen ondoren).

Adin tarteen arabera, 45 urtetik gorako taldea izan da langabeziatik atera den kolektiboa (-295), eta, hain zuzen ere, kolektibo horrekin ari da egiten ahalegin berezia Ekonomia, Lan eta Enplegu Saila, 50 urtetik gorako pertsonen prestakuntzarako eta enplegagarritasuna sustatzeko ekintzen bidez abian jarritako politiken bidez.

Sektoreka, hileko terminoetan, langabeziak behera egin du sektore guztietan, aurretik enplegurik ez zutenen kolektiboan izan ezik (+510). Bilakaerarik onena zerbitzuen sektorean (665 langabe gutxiago) eta nekazaritza eta arrantzan (-%1,12) izan da.

Urte arteko datuei erreparatuz gero, joera antzekoa da: zerbitzuen sektoreak bilakaera hobea izan du termino absolutuetan (-2.360) eta nekazaritzan eta arrantzan termino erlatiboetan (-% 6,89), eta eraikuntzak, berriz, urte arteko jaitsiera (% 8,71). Urte arteko portaera okerrena aurretik enplegurik ez zutenen artean izan da (+205).

Sexuaren arabera, emakumeen langabeziak portaera hobea izan du, 235 emakume gutxiago baitaude langabezian; gizonen artean, berriz, 95 gehiago daude langabezian. Urte arteko balantzean ere ikusten da emakumeen langabeziak portaera hobea izan duela (-1.425 gizon eta -1.732 emakume).

Kontratuak eta Gizarte Segurantza

Kontratazioari dagokionez, martxoan 57.449 kontratu erregistratu dira; horietatik 13.734 (% 23,9) mugagabeak izan dira, eta ehuneko hori egonkor mantendu da lan erreformaz geroztik. Kontratazio bolumena % 8,04 igo da aurreko hilaren aldean, eta % 3,59 iazko martxoaren aldean.

Sektoreka, etxeetako eta higiezinetako jarduerak nabarmentzen dira (kontratuen % 88 mugagabeak dira), eta eraikuntza (kontratazio mugagabearen tasa % 65,9 da). Horrela, sektore horretako joera positiboa berretsi da.

Euskadiko afiliazioak ere datu positiboak izan zituen, 4.541 kotizatzaile gehiago izan baitziren otsailarekin alderatuta, % 0,45 gehiago. Martxoa amaitzean, 1.022.439 afiliatu zeuden Euskadin. Zifra hori milioi bat kotizatzailetik gorakoa da, eta horrek egiaztatzen du azken hilabeteetan joera finkatua eta egonkorra izan dela. Urte arteko datuak kontuan hartuta, Euskal Autonomia Erkidegoan 10.311 afiliatu daude, hau da, % 1,02 gehiago, 2024ko martxoarekin alderatuta.

Ondorioz, ziurgabetasun globalak eta martxoa aurreikuspen zaileko hilabetea izan arren, joera positiboa berretsi da; batez ere, urte arteko terminoetan. Joera hori, bereziki, 45 urtetik gorakoetan izan da, eta Enplegu Zerbitzu Publikoak, Lanbidek eta Ekonomia, Lan eta Enplegu Sailak enplegu politika aktiboak bultzatzen jarraitzera bultzatzen gaitu.