Javier Hurtado Turismo, Merkataritza eta Kontsumoko sailburua Euskadiko Turismoaren Kode Etikoari atxikitako erakunde berriei ziurtagiriak emateko ekitaldian izan da gaur. 86 enpresa berri sartu dira, eta, guztira, 765 enpresa dira Kodearen parte. Kode horrek prestakuntza eta auditoretza integrala eskatzen ditu, jasangarritasunaren aldeko konpromisoa betetzen dela bermatzeko.
Euskadi aitzindari izan zen 2019an Turismoaren Kode Etikoa aldarrikatzen (NBEren turismoaren agentziak babestutako kodea), eta 2022an Etika Turistikoaren Erregistroa sortzen. Gaur, Etika Batzordeak batzarra egin du, akreditazioak eman aurretik, eta bertan izan dira NBEren turismoaren agentziako eta Turismo, Merkataritza eta Kontsumo Saileko ordezkariak, Basquetourren bitartez.
Sailburuak azaldu duenez, turismoa «pertsonen arteko hartu-emanean oinarritutako jarduera da, eta, horregatik, etikarekin estuki lotuta egon behar du beti, alderdi guztietan. Turismoak bizikidetzan oinarritu behar du, turistak hartzen dituzten herritarrengan eragin positiboa sortzeko. Izan ere, helmuga bat ez da mapa bateko txintxeta bat, ezta sare sozialetako post bat ere. Helmuga bat lurralde bat da, kultura bat, ekosistema bat. Euskadin argi izan dugu hori, eta horrek jasangarritasunaren eta turismo-etikaren aldeko apustua egitera eraman gaitu».
Ildo horretan, sailburuak turismo jasangarriaren definizioa azpimarratu du: «Turismo horren onurek komunitateari eragin behar diote. Eta, era berean, ingurumenean eta tokiko kulturan eragin minimoa sortzen duen jarduera garatzen duen turismo batez ari gara. Beraz, turismo-erantzukizunak eta turismo-jasangarritasunak hiru alderdi horiek hartu behar dituzte kontuan beti: ingurumenekoa, soziokulturala eta ekonomikoa«.
«6 urteko ibilbidea egin dugu Turismoaren Kode Etikoa ezartzea erabaki genuenetik. Denbora horretan, etengabe lan egin dugu hobetzeko eta egokitzeko, 8 printzipioak seitan batzen dituen bertsio berri batekin. Eta material berriekin ere bai, ezagutzera emateko, sustapenerako eta profesionalentzako webgune berri baten bidez eta turista arduratsuaren gidaren bertsio berri baten bidez, jasangarritasunaren garrantziaz sentsibilizatzen jarraitzeko. Eta horretan, enpresak ezinbestekoak zarete zuen lanarekin eta konpromisoarekin», esan du amaitzeko.
