Raul Perez Iratxeta Eusko Jaurlaritzako Elikadura eta Landa Garapeneko sailburuordeak aste honetan IFEMA azoka-esparruan egingo den Madrilgo 38. Salón Gourmets azoka irekitzeko ekitaldian parte hartu du gaur goizean. “Hitzordu hau erreferentziala da kalitate handiko elikagaien eta gastronomiaren sektoreko euskal enpresak sustatzeko, eta bertan 2.000 erakusketari, 100.000 bisitari profesional baino gehiago, 85 herrialde ordezkatuta eta 239 milioi eurotik gorako negozio-bolumena izango dira”, zehaztu du.
Eusko Jaurlaritzak, Euskadi Basque Country markaren bidez, euskal enpresen partaidetza elkartua bultzatzen du, aukerako produktuei eskainitako Europako azoka honetan. “2025eko edizio honetan, gure gastronomiako onena ordezkatzen duten 30 enpresa baino gehiago bildu ditugu: kontserbak, urdaitegia, gozoak, haragi-produktuak, elaboratuak, ardoak eta edariak… Guztiak konpromiso beraren pean elkartuta: kalitatezko produktuak, jatorri argikoak eta dauden lekuan miretsiak”, azpimarratu du Iratxetak.
Euskadiko standa 3/3D40 Hallean dago. Aurten, Euskadi Basque Country standak 31 euskal enpresa hartuko ditu eta BASQUE TXOKOA gunea izango du. Gourmets azokan hainbat sustapen-ekintza egingo dira elkarte gastronomiko edo txoko baten itxura duen gune honetan.
Bihar, asteartea, apirilak 8, ardo-dastaketak egingo dira Mikel Garaizabal eta Jose Ignacio Junguiturekin, eta asteazkenean, apirilaren 9an, destilatuen dastaketa egingo da Jose Luis Navarro eta Manuel Iturregirekin. Jarduera horietara sektoreko hainbat gonbidatu, influencerrak eta prentsa gastronomia joango dira. Euskadiko pabiloian parte hartzen duten enpresek Basque Txokoan egingo dituzte euren sustapen-ekintzak. Gainera, beste euskal enpresa batzuk ere egongo dira 2025eko Gourmets azokako beste pabiloi batzuetan, modu independentean. “Horien presentziak euskal sektorearen garrantzia indartzen du azokan”, nabarmendu du Perez Iratxetak.
