Ogasun eta Finantzetako sailburu Noël d’Anjouren ustez, Europan zerga-politikaren eginkizun aktiboagoa eskatzen ari dira, eta, bere iritzian, horrek finantza publikoen kalitatea hobetzea eskatzen du, batez ere inbertsioen bidez.
Ildo horretatik, Euskadin “argi daukagu gure herrialdearen hazkundea ahalbidetuko duen fiskalitatearen alde egitea dela helburua; gure lehentasuna gure herrialdearen garapen ekonomiko eta soziala bultzatzea da”, nabarmendu du gaur egindako enpresa-topaketan. Topaketa horren ardatza izan da “Fiskalitatearen nazioarteko panorama: segurtasun juridikoa lehiakortasunaren eta enpresa-inbertsioaren oinarri gisa”, etorkizuneko tributu globala eztabaidatzea helburu hartuta.
D’Anjouk zehaztu duenez, nazioarteko fiskalitateari dagokionez, aurrera egiteko modu bakarra “jurisdikzioen ikuspegi koordinatu eta kooperatibo baten bidez” aurrera egitea da, nazioarteko foroetan landu diren akordio eta adostasunei balioa emanda, batez ere ELGAren eta G-20ren BEPS Esparru Inklusiboaren barruan.
“Horregatik, guk garrantzi berezia ematen diogu eztabaidetan aktiboki parte hartu ahal izateari. Euskal erakundeek zergen arloko eskumenak dituzte, eta horiek edozein estaturen parekoak egiten gaituzte ikuspegi horretatik”, nabarmendu du.
Ekonomia Itunaren Batzorde Mistoaren azken hiru bileretan adostutako akordioek, hain zuzen ere, aukera emango dute zergen arloko goi-mailako taldeetan egon eta parte hartu ahal izateko, “Eusko Jaurlaritzak Euskadi globalaren eraikuntzan duen posizioa indartuta”.
Akordio horiek, euskal ogasunen “nazioarteko agerikotasuna” ez ezik, berekin ekarriko dute etorkizuneko fiskalitatea aztertu eta proiektatzen den foroetan aktiboki parte hartzea ere. “Maila anitzeko gobernantza eraginkorraren adibide argia da hori, Europar Batasun hurbilago eta kohesionatuago baten eraikuntza indartzen duen gobernantza batena”, d’Anjouren iritzian.
Enpresa-topaketa honetan, Ogasun eta Finantzetako sailburuak Eusko Jaurlaritzak urte honetarako egindako aurreikuspenen azken berrikuspena ere aipatu du, eta Euskadiko ekonomia % 2,1 haziko dela estimatu du, aurreko aurreikuspenean aurreikusitakoa baino hamarren bat gehiago. Europako herrialde nagusietako batzuena baino hazkunde handiagoa da.
“Badakigu egiturazko erronkak eta nazioarteko tirabirak uztartzen diren une batean bizi garela. Eta, horregatik, susperraldi jasangarria eta orekatua ahalbidetuko duten politikak bultzatu behar ditugu”, azpimarratu du. Sustapen horrek, bere ustez, hiru lurralde historikoetako tributu-sistema ahalbidetzen du, jarduera ekonomikoaren garapena, ekintzailetzaren sustapena eta kalitatezko enpleguaren sorrera errazteko eta babesteko.
“Horretan sinetsita gaude; horixe da Euskadin egiten ari garena laurogeita hamarreko hamarkadan Ekonomia Itunak esparru honetan aitortzen dizkigun eskumenak baliatzen hasi ginenetik”, adierazi du d’Anjouk Bilbon egindako foro honetan.
