Gaur goizean, Lehendakari Imanol Pradalesek, Amaia Barredo Elikadura, Landa Garapena eta Nekazaritza sailburuarekin batera, Elorrioko Eroskiren egoitza eta logistika-plataforma bisitatu ditu, kooperatibaren 50. urteurrena dela eta. Bisitaren ondoren, Lehendakariak azpimarratu du nekazaritza eta elikagaien sektoreak Euskadiko garapen ekonomiko eta sozialean duen funtsezko zeregina.
Hitzaldian, Lehendakariak kezka adierazi du Trump administrazioaren muga-zergen neurriek izango duten eraginagatik, bereziki ardo, esneki eta arrain-kontserben sektoreetan. Ildo horretan, Euskadiko lehen sektorearen interesak defendatzeko, Eusko Jaurlaritzak Madril, Paris eta Bruselarekin elkarrizketa aktiboa mantenduko duela ziurtatu du.
«Euskal enpresekin eta eragileekin etengabeko harremana dugu, Trump administrazioaren muga-zergen neurrien ondorioei erantzuteko. Oso kezkatuta gaude. Asko dago jokoan, batez ere ardo, esneki eta arrain-kontserben sektorean. Iaz, 40 milioi eurotik gorako esportazioak egin genituen. Jakizue ez zaudetela bakarrik. Zuen kezka gurea ere bada. Gogor defendatuko zaituztegu behar den tokian,” adierazi du Lehendakariak.
Izan ere, Gobernu Kontseiluak hurrengo bileran aztertuko ditu babes eta laguntza neurriak aktibatuko diren arlo guztiak, merkataritza-gerraren eragin handiena jasaten duten sektoreak babesteko. Gainera, asteazkenean, Industria Defentsarako Taldeak neurri horien eraginik handiena jasaten duten euskal enpresak bilduko ditu, baita eragile sozialak, klusterrak eta euskal erakundeak ere, arintze-estrategiak partekatu eta sustatzeko.
Pradalesek sektore honen garrantzia nabarmendu du, enplegua sortzeko gaitasuna duelako, lurralde-oreka bermatzen duelako eta iraunkortasunaren motorra delako. «Euskal nekazaritza eta elikagaien industria gure ekonomiaren eta ongizatearen oinarri sendoa da. Bere garapena lau oinarri nagusitan bermatu behar da: Osasungarria, Segurua, Berezia eta Iraunkorra izatea. Horretarako, erakundeen, enpresen eta ekoizleen arteko lankidetza ezinbestekoa da,” azpimarratu du Pradalesek.
Gainera, Lehendakariak nabarmendu du Eroskirekin lankidetzan jarraitzeko beharra, 2024ko lehen seihilekoan 242 milioi eurotik gorako tokiko produktuen erosketak egin baititu.
Eusko Jaurlaritzak eta Eroskik laster berrituko dute 2007an sinatu eta 2013an eta 2022an eguneratutako lankidetza-hitzarmena. Hitzarmen honen helburua da euskal nekazaritza eta elikagaien industria indartzea eta garatzea, tokiko ekoizpena sustatuz, elikadura osasungarria bultzatuz eta balio-kate osoan praktika iraunkorrak hartuz.
Bisitan zehar, Pradalesek Eroski zoriondu du bost hamarkadako ibilbideagatik eta bertako produktuekiko eta hurbileko ekonomiaren aldeko konpromisoagatik. Kooperatibaren rola nabarmendu du, “euskal nekazaritza eta elikagaien katearen motor nagusietako bat” dela azpimarratuz, 350 hornitzaile lokalekin egiten duen lanari eta bere establezimenduetan eskaintzen dituen 6.800 produktu baino gehiagori esker.
