Ekainaren 16an, Eusko Jaurlaritzak omenaldi ekitaldi instituzional bat egingo du Ajuria Enean, Imanol Pradales Lehendakaria buru dela, Carlos Garaikoetxea Lehendakariaren kargu-zinaren 45. urteurrena eta estatutu-aldiko lehen Eusko Jaurlaritzaren Gobernu Kontseiluaren lehen bilera direla eta.
Omenaldia Ajuria Enean egingo da, Lehendakaritzaren egoitzan, ia lau hamarkadako diktaduraren eta errepresioaren ondoren Euskadin aro berri bat hasi izanaren sinbolo gisa. Garaikoetxea Lehendakariak gidatutako lehen gobernu hark ezegonkortasun politiko eta sozial handieneko egoerari aurre egin zion, ilusioak eta itxaropenak markatuta, baina baita zalantza sakonek ere. Orduan, herri moderno eta demokratiko baten oinarriak jarri ziren.
Imanol Pradales Lehendakariak nabarmendu duenez, lehen Eusko Jaurlaritzaren lanari esker «egungo Euskadiren oinarriak ezarri ahal izan dira, Herri moderno, lehiakor eta aurreratua, eta horri esker, lekukoa hartu dugunok oparotasunean eta ongizatean hazten jarraitzeko tresnak ditugu». «Gaitasun horiek indartzen eta zabaltzen jarraitu behar dugu; izan ere, ia eremu guztietan hobetu dugun arren, belaunaldi bakoitzak bere erronkak eta ziurgabetasunak ditu. Gauza guztiak egiteko zeudenean onena eman zuten pertsonen erabaki, autoexijentzia eta asmatze berarekin egingo ditugu», adierazi du.
Ekainaren 16ko ekitaldia, beraz, azken 45 urteetan Euskadiren garapena ahalbidetu duten egitura instituzionalak eraiki eta ireki zituztenei errekonozimendua, oroimena eta eskerrak emateko hitzordua izango da.
