Ertzaintzako agenteek 31 urteko gizon bat atxilotu zuten atzo gauean Donostian, bi adingaberen aurkako sexu-abusuaren ahalegina leporatuta. Gizonak kalean lagunekin zeudela jazarri zituen adingabeak.
Atzo, astelehena, 21:00ak aldera gertatu zen Donostia erdialdean. Neska-mutil batzuek ibilgailu ofizial batean zirkulatzen ari zen herritarren babeserako patruila bati deitu zioten, eta, aldi berean, gizon batek, agenteak ikustean, presaka alde egin zuen.
Polizia-baliabideak gizona geldiarazi eta identifikatu zuen. Bien bitartean, bi gazteren eta lekuko batzuen testigantzak jaso zituzten agenteek. Inplikatua, dirudienez, gazte taldera hurbildu zen eta neskak, adingabeak, jazartzen hasi zen. Agenteek jakin ahal izan zutenez, nesketako bati musu ematen eta besotik heltzen saiatu zen, eta beste adingabe bati, berriz, besotik heldu eta tira egin zion, baina neskak askatzea eta alde egitea lortu zuen.
Testigantzetan eta salatutako egintzetan oinarrituta, patruilak atxilotu egin zuen identifikatutako gizona, adingabeen aurkako sexu-abusuaren ahalegina leporatuta. Atxilotua gaur utziko dute Donostiako Guardiako Epaitegiaren eskuetan.
