Gobernu Kontseiluak onartu egin du bizikidetzarako eta giza eskubideetarako proiektuetara bideratutako laguntzen deialdia; aurten, 900.000 euro bideratuko dira, guztira.
Laguntza horien helburua gure gizartean bizikidetzaren, giza eskubideekiko errespetuaren, enpatiaren eta elkartasunaren kultura eta biktimak gizartera hurbiltzea da eta, horretarako, partekatutako espazioak sortzea.
Zehazki, irabazi-asmorik gabeko erakunde pribatuek martxan jartzen dituzten laguntzak deitu dira; horien barruan daude bizikidetza eta giza eskubideak helburu dituzten terrorismoaren biktimen elkarteak eta pertsona juridikoak.
Laguntzak honako eremu hauetan programak eta jarduerak egitera bideratzen dira:
a) Bizikidetza eta giza eskubideak:
- Giza duintasunarekiko, giza eskubideekiko eta bizikidetza kontziliatuarekiko konpromisoa sustatzea helburu duten parte-hartzeko, zabalkunderako edo gizarte-hezkuntzako jarduketak.
- Gizartean edonolako indarkeriari, terrorismoari edo giza eskubideen urraketari lotutako kontzientzia kritikoa eta deslegitimatzailea sustatzeko ekimenak.
- Iraganean gertatutako edonolako indarkeria-motaren inguruan, hausnarketa kritikoko eta gizarteratzeko prozesuetan lagundu ahal izateko programak, Europako justizia leheneratzailearen joerarekin bat.
- Gizarte-partaidetzako esperientziak eta bizikidetza normalizatuaren erronken gaineko elkarrizketa desberdinen artean, aniztasuna eta gizarte-topaketa sustatzeko.
b) Biktimak eta gizartea:
- Terrorismoaren biktimei laguntza emateko ekintzak.
- Politikagatiko indarkeriaren testuinguruan giza eskubideen urraketen biktima direnei laguntza emateko jarduketak.
- Biktimen eta gizartearen arteko lotura sustatzen duten programak, bai eta biktimek bizikidetzaren eraikuntzari aurrerapenen eta bilakaeren parte-hartzaile diren aldetik egiten dioten ekarpena sustatzen dutenak ere.
c) Aniztasuna eta elkartasuna:
- Aniztasunaren kudeaketa positiboaren eta arrazismoaren, xenofobiaren edo gorroto-delituen prebentzioaren balioak sustatzen dituzten proiektuak.
- Elkartasunaren eta gizarte-inplikazioaren balioak sustatzen dituzten esperientziak, desberdintasuneko, diskriminazioko, bidegabekeriako, bazterketako edo marjinazioko modu kritikoenen aurrean.
- Elkartasuneko, inplikazioko eta gizarte-mugikortasuneko ekintzak, indarkeriarako, gerrarako eta nazioarteko terrorismorako adierazpen berrien aurrean.
