Udal berdintasun planaren baitan, emakume etorkinen kolektiboari gizarteratzeko eta laneratzeko baliabideak eskaintzeko programak abian jartzea jasotzen du, eta bide horren baitan sinatu da hitzarmena.
“Zaintzan lanean aritzen diren emakumeak une jakinetan lanik gabe eta bizitokirik gabe, oso egoera ahulean gelditzen dira. Emakume horiek egoera horietan babestea eta beraien bizi kalitatea hobetzea lortu nahi da hitzarmen honen bidez”, adierazi du Nagore Alkorta alkateak.
Malen Etxeko Harrera Etxeen helburua emakume etorkinen ahalduntzerako eta laneratzeko ingurune seguruak sortzea da; izan ere, migrazio-izaerarekin lotutako hainbat faktore direla eta, ahultasun-egoeren eta lan-esplotaziorako arriskuaren eraginpean daude. Horrela, Azpeitiakoa bezalako harrera etxeek etorkizuna proiektatzeko, prestatzeko eta lana baldintza duinetan bilatzeko aukera ematen duten espazio bihurtzen dira.
