Bilboko Udalaren garraio-zerbitzua, Bilbobus, AENORen UNE 16880 Zerbitzuan bikaintasun-ziurtagiria lortu duen Espainiako lehen garraio-operadorea bihurtu da, erabiltzaileei kalitate-estandar handiko zerbitzua eman zaiela egiaztatzen duena. Alfonso Gil alkateorde eta Mugikortasun eta Jasangarritasun Saileko zinegotzi ordezkariak gaur bertan jaso du ziurtagiria, AENORen Euskadiko zuzendari Luz Emparanzaren eskutik, bihar Bilbobuseko flotan sartuko diren 21 ibilgailu hibrido berrien aurkezpenean. Gainera, Bilbobus udal-garraio publikoko zerbitzuak duela gutxi AENOR UNE 170001-1 ziurtagiria lortu du, bere flotaren irisgarritasun unibertsalagatik. Ziurtagiri horrek egiaztatzen du zerbitzuak gaitasuna duela erabiltzaileak egoera guztietan garraiatzeko.
“Bilbobus garraio segurua, irisgarria, eraginkorra, jasangarria eta kalitatezkoa da. Hala erakusten dute gaur aurkezten ditugun 21 unitateen ezaugarriek eta prestazioek, eta hala egiaztatzen dute AENORen 19 ziurtagiriek «, azaldu du Alfonso Gilek aurkezpenean.
AENORen Euskadiko zuzendaria den Luz Emparanzak nabarmendu duenez, “Zerbitzuaren bikaitasunaren ziurtapena konbinatzea oso egokia da. Ziurtapen bikoitza honen bidez, bezeroaren esperientzian oinarritutako zerbitzua lortzen dugu, baita oztoporik gabeko eta irisgarritasuna den hiritar guztientzako zerbitzua ere».
Bihar zirkulazioan jarriko diren unitate berriekin, Bilbobuseko historian izan den flotaren berrikuntzarik handiena amaituko da, azken bi urteetan 88 unitate berri sartu baitira. Horrela, bada, Bilboko Udaleko Mugikortasun eta Jasangarritasun Sailak beste urrats bat eman du Hiri-Mugikortasun Jasangarriaren aldeko Itunean jasotako konpromisoak betetzeko bidean eta herritarren ongizatea garapen urbanoaren erdian jartzen.
Une honetan, Bilbobuseko flotaren % 65 berrituta dago eta autobusek, batez beste, 3,9 urte dituzte. Udalaren garraio-zerbitzuak 83 ibilgailu hibrido eta 11 elektriko ditu.
