Udaltzaingoak uztailean pandemian osasun-baldintza egokiak gertatzen direla bermatzeko garatuko duen antolaketa berezia aurkeztu du gaur Barakaldoko Herritarren Segurtasuna eta Babes Zibila Arloko zinegotzi Ángel Madrazok. Ekimena arratsaldeko eta asteburuetako gaueko lantaldeak nabarmen indartzean datza.
Udalak antolatutako jendaurreko ekitaldiak edo beste batzuk direla-eta pilaketak gerta daitezkeen tokietan jarriko du arreta operatibo horrek. Baita jendea eta ostalaritza-establezimenduak ugaritzen diren eremuetan ere, hala nola erdialdeko Zaballa kalean edo beste auzo batzuetan, edo botelloia egin ohi den lekuetan.
«Kutsatzeei aurrea hartu nahi diegu, zaintza areagotuz. Segurtasun-distantziari eutsi ezin zaionean musukoa erabiltzen dela edo ostalaritzako lokalek ezarritako ordutegiak ez ezik terrazetako edukierak eta Arandia ere errespetatzen dituztela egiaztatuko dute agenteek», azaldu du Madrazok.
Gogoan izan behar da Barakaldok uztailean ospatzen dituela zaindariaren jaiak; zehazki, 16aren aurreko eta ondorengo egunetan (Karmen Eguna). 2020an bezala, aurten ere pandemiak bertan behera utzi ditu jaiak. Inguruko udalerri batzuetan arazoak sortzen ari dira ‘ez jaiak’ direla eta. Ángel Madrazok ohartarazi duenez, «Horrela deitzeak edo ordezko ekintzak antolatzeak azkenean mesede egin dakioke jende-pilaketak gertatzeari».
Botiloiari dagokionez, Herritarren Segurtasuna eta Babes Zibila Arloko zinegotziak adierazi du «Gaur egun arte, beste udalerri batzuetan bezala, gazteen bilera jendetsuak egin ez badira ere, kezkatuta gaude Barakaldoko jaiak ospatu ohi diren egun horietan horrelako elkarretaratzeak gerta daitezkeelako».
