Ikasturtearen amaieran, urtero bezala, Barakaldoko ikastetxeak hurrengorako prest jarri behar izaten dira. Oraingo honetan, dozena bat ikastetxetan baino gehiagotan egingo dira lanak, besteak beste, arotzeria hobetzeko, komunak berritzeko, galdarak hobetzeko edo sarbide berriak sortzeko. Nabarmenena eta behar handienekoa Arrontegi ikastetxekoa da, Eusko Jaurlaritzak egingo duen jantokia handituta. «Obra horiek 900.000 euro inguruko inbertsioa dakarte, eta horiekin kalitatezko hezkuntzaren aldeko apustua egiten dugu barakaldarrentzat», iragarri du Amaia del Campo alkateak.
Horrela, uda honetan 10 ekipamenduk irekiko dituzte ateak instalazioak berritzeko: kanpoko zoladurak margotuko dituzte, galdarak berrituko dituzte, jatzi-toki berriak jarriko dituzte, haur-jolasetan konponketak egingo dituzte, sarbide berriak jarriko dituzte, aire girotuko sistemak jarriko dituzte ¿
Udal Azpiegitura eta Hezkuntza arloek elkarrekin lan egiten dute lan horiek koordinatzeko, udalak eskumena duen ikastetxe publikoetan. «Azken legealdian bi milioi euro baino gehiago inbertitu ditugu gure ikastetxeetan hobekuntzak egiteko. Zenbateko horri azken bi ikasturteetan inbertitutako milioi erdi euro gehitu beharko litzaioke, bai eta Eusko Jaurlaritzarekin lankidetzan egindako proiektu garrantzitsu batzuk ere, hala nola, Arrontegi ikastetxeko aterpea, iaz amaitu zena, edo Hezkuntza Saila Trueba institutu berria eraikitzeko garatzen ari den lanak, edo ikasturte honetan ikastetxe publikoetan karpak jartzea, ikasleek aire librean jolas zezaten, koronabirusetik babestuta», gogoratu du alkateak.
Aurten, zehazki, 900.000 euro inguru bideratuko dira ikastetxeen hobekuntzetara, 300.000 inguru Udalaren aldetik eta 590.000 euro Arrontegiko jantokiko obrara. «Inbertsio handia da, eta aukera emango digu ikastetxeak ikasturtearen hasierarako egokitzeko eta, urtez urte, ikasleei ematen zaizkien zerbitzuak hobetzeko», zehaztu du. Guztira, 20 hobekuntza-jarduera baino gehiago egingo dira ikastetxe publiko hauetan: Arteagabeitia, Bagatza, Gurutzeta, Ibaibe, Larrea, Zuhatzu, Alkartu, Beteluri, Munoa Arrontegi eta Gurutzetako Haurreskolan.
