Athletic Clubeko Estatutuen Erreformarako Batzordeak, bi urteko lanaren ondoren, Estatutuen Erreformarako Aurreproiektua argitaratu du webguneko Bazkideen Txokoan. Estatutuz kanpoko aldi bat irekiko da, estatutuetan ezarritako epea baino lehen bazkideek iradokizunak eta ekarpenak egin ditzaten.
Dokumentua Bazkideen Txokoan kontsulta daiteke, ’Estatutuen Erreforma’ atalaren barruan. Bertan, egungo testuarekiko planteatutako aldaketa guztiak zehazten dira, eta horietako bakoitzean proposamenari buruzko azalpena zehazten da.
Dokumentu osoaz gain, bazkideek aurreproiektuaren laburpen bat aurki dezakete webguneko Txokoan, eta horri buruzko iradokizunak eta ekarpenak egin ditzakete estatutuz kanpoko aldi honetan, datorren urtarrilaren 24ko 18:00ak arte. Horretarako, epigrafe berean, Batzordeari zuzenean ekarpenak egiteko botoi bat dute gaituta, eta, bazkideak hala nahi badu, gainerako bazkideek ere kontsultatu ahal izango dituzte bere iradokizunak. Batzordeko kideekin ere bilera eskatu ahal izango da bertan.
Gainera, Estatutuen Erreformarako Batzordea (Josu Arteta, Gorka Cubes, Aitor Elizegi, Aner Uriarte eta Ana Urquijo) nahi duten bazkide konpromisarioekin bilduko da urtarrilaren 10ean eta 19an San Mamesen egingo diren bi hitzordu presentzialetan. Bilera horietarako izen-emate prozesua datorren astean irekiko da, eta datak luzatuko dira, eskaera-kopuruak hala eskatzen badu.
Estatutuz kanpoko aldi honetan, urtarrilaren 24ra arte, Athletic Clubeko bazkideek beren ekarpenak eta iradokizunak egin ahal izango dituzte aurreproiektuan estatutos@athletic-club.eus postaren bidez ere edo Bazkideen Arretarako Bulegoan aurkeztutako idazki baten bidez.
Estatutuz kanpoko aldia amaituta, eta aurreproiektua aldatzeko eta hobetzeko iradokizun eta ekarpen guztiak aztertu eta erantzun ondoren, araututako prozedura hasteko egutegirik egokiena definitu eta argitaratuko da, estatutuak aldatzeko Athletic Cluben egungo Estatutu Sozialen Lehenengo Xedapen Gehigarrian aurreikusitako arauen barruan. Ezohiko Batzar batean bozkatuko da erreforma-proiektuaren behin betiko proposamena.
