Eusko Jaurlaritzak oniritzia eman du, Josu Erkoreka lehenengo lehendakariorde eta Segurtasuneko sailburuaren Agindu baten bidez, AZTI Fundazioari elementu ozeano-meteorologikoen zaintzarako, jarraipenerako, kontrolerako eta kudeaketarako 195.000 euroko dirulaguntza emateko.
Eusko Jaurlaritzaren eta AZTI Fundazioaren arteko proiektu bateratuaren baitan hainbat sentsorizazio daude instalatuta, azterlanak eta ikerketak sortzen dituztenak, bai eta itsasoaren ezagutza eta atmosferarekin eta gizartearekin duen harremana hobetzeko sistemak ere. Adibide ugari daude, hala nola: itsas prozesuak denbora errealean monitorizatzeko hainbat sistemaren inplementazioa, itsasoaren etorkizuneko portaerari buruzko aurreikuspenak izatea ahalbidetzen duten zenbakizko aplikazioak, portaera horrek gizarteko jarduera-sektore guztietako segurtasunarekin eta eraginkortasunarekin duen erlazioa eta itsasoko ekonomia.
Itsasoaren eta itsasertzaren portaera behatzeko eta iragartzeko, bi aldeek honako ildo hauek lantzen dituzte: plataforma anitzeko kostaldeko behatokiak garatzea –Euskalmetek erabiltzen dituen buia ozeano-meteorologikoak barne– eta kostaldeko arriskuetara bideratutako iragarpena.
Hitzarmena AZTI Fundazioarekin
Segurtasun Sailari izendatutako eskumenen artean daude titulartasun propioko meteorologia-zerbitzuak planifikatzearekin eta koordinatzearekin lotuta dauden neurriak garatzea eta koordinatzea, bai eta sare ozeano-hidro-meteorologikoa eta eguraldi atmosferikoa zaintzea, aztertzea eta iragartzea ere. Era berean, zerbitzu publikoetarako (babes zibila edo bide-segurtasuna) informazio meteorologiko eta klimatologikorako politikak eta produktuak lantzeaz, kudeatzeaz eta garatzeaz ere arduratzen da.
Hitzarmenaren indarraldia 2021eko abenduaren 31n amaitu zen eta beste bi urtez luzatu zen (2022ko urtarrilaren 1etik 2023ko abenduaren 31ra). Modu horretara, AZTI Fundazioak 195.000 euro jasoko ditu dirulaguntza nominatiboaren kontzeptupean bai aurten eta bai datorren urtean.
