Datozen egunetan, Euskal Autonomia Erkidegoko Laneko Ikuskaritzak 3.559 gutun bidaliko dizkie EAEko beste hainbeste enpresari, Iruzurraren aurka Borrokatzeko Tresnaren arabera egoera irregularrean egon daitezkeen 9.950 kontraturen egoera berrikus dezaten. Zehazki, baimendutako gehieneko epeak gainditzen dituzten aldi baterako kontratuei, aldi baterako kontratuen kateatzeari eta aldizkako kontratu finkoen erabileran dauden irregulartasunei buruzkoak dira. Horrela, kontratazio horiek berriki onartutako lan-erreformara egokitu nahi dira.
Jarduera hori Estatuko Laneko eta Gizarte Segurantzako Ikuskaritzarekin lankidetzan egiten da, Iruzurraren aurka Borrokatzeko Tresna garatuz eta elkarrekin erabiliz. Sistema informatiko horrek gizarte-arloko arau-haustetzat har daitezkeen egoera irregularrak detektatzen ditu. Teknologia erabiliz Iruzurraren aurka Borrokatzeko Tresnak aukera ematen du datuak gurutzatzeko eta aldi baterako kontratuen arloan irregulartasunak edo arau-ez-betetzeak gerta daitezkeen egoerak detektatzeko.
Urteko lehen bidalketa honetan, alde batetik, 771 gutun banatuko dira, zeinetan jakinarazten baita irregulartasunak antzeman direla baimendutako gehieneko epeak gainditzen dituzten aldi baterako kontratuen erabileran, eta irregulartasun horiek honako kasu hauei dagozkiela: duela 48 hilabete baino gehiagotik indarrean dauden obra edo zerbitzu jakineko kontratuak; ekoizpenaren zirkunstantziek eragindako behin-behineko kontratuak, 12 hilabete baino gehiagokoak; eta duela 36 hilabete baino gehiagotik indarrean dauden obra- edo zerbitzu-kontratuak. Jokabide hori gaur egun altan enplegatuak dituzten enpresa guztien %1,1ean ikusten da. 771 kartetatik 89 Arabako enpresari dagozkie, 115 kontraturekin, 204 Gipuzkoakori (237 kontratu) eta 478 Bizkaikori (728 kontratu).
Bigarren gutun-eredu bat dago, 2.468 enpresak jasoko dutena (311 Araban, 715 Gipuzkoan eta 1.442 Bizkaian); izan ere, aldi baterako kontratuen ondoz ondoko kateatzea antzeman da, benetan aldi baterako izaerarik ez duten errealitateei dagozkienak. Jokabide hori enpresen % 4an ikusi da. 775 kontratu izan daitezke Araban, 2.092 Gipuzkoan eta 4.836 Bizkaian.
Era berean, Laneko Ikuskaritzak beste 320 enpresari igorri dizkie aldizkako kontratu finkoaren erabileran hautemandako irregulartasun posibleen ondorioz kontratazioan iruzur egin ahal izateari buruzko gutunak. Horrela, Arabako 32 enpresari, 129 Gipuzkoakori eta 159 Bizkaikori jakinarazi die ezin dela aldizkako izaera finkotzat hartu denboran etenik gabe mantentzen den harremana. 86 kontratu izango lirateke Araban, 411 Gipuzkoan eta 574 Bizkaian. Enpresen %1,1ek dute jokabide hori. Gainera, eta arau-hauste beragatik, 8 kontserba-enpresari gutunak bidali zaizkie 96 kontratu erregularizatzeko.
16.494 kontratu erregularizatu dira 2021ean
Iaz hiru bidalketa masibo egin ziren otsailean, apirilean eta urrian, eta horietan 9.000 gutun inguru bidali ziren aldi baterako 22.852 kontratu berrikusteko eskatuz. Horietatik 14.152 mugagabe eta lanaldi osokoak bihurtu ziren.
Txoke-plan horri Euskadiko Laneko Ikuskaritzaren ohiko jarduera gehitu behar zaio, 2021ean beste 10.964 kontratu berrikusi baitzituen. Kopuru horretatik, Ikuskaritzak eskatuta, 2.342 kontratu mugagabe bihurtu ziren. Bi jarduera horiekin 16.494 kontratu erregularizatzea lortu zen.
Datozen egunetan bidaliko diren 3.559 gutunetan, enpresei jakinarazten zaie 9.950 lan-kontratuak erregularizatzeko hilabete dutela, eta, horrela egiten ez badute, Laneko Ikuskaritzaren jardunak hasiko direla. Gainera, gogorarazten da ez-betetzeak arau-hauste larritzat jotzen direla.
