Urkullu Lehendakariak Corcegara egindako bidaia ofizialaren bigarren eta azken eguna hasi du Savaghju-Vivariu hizkuntza-murgilketarako zentrora egindako bisitarekin. Giles Simeoni Korsikako Kontseilu Betearazleko presidenteak, Marian Elorza Kanpo Harremanetarako idazkari nagusiak eta Mikel Anton Europako Gaietarako zuzendariak lagunduta, Lehendakariak programaren xehetasunak ezagutu ahal izan ditu zentroko profesionalen eskutik.
Bisitaren ondoren elkarrekin egindako adierazpenetan, Lehendakariak adierazi du beharrezkoa dela hizkuntza gutxituetan inbertitzea, pertsona guztien hizkuntza-eskubideak benetan errespetatu ahal izateko. Lehendakariak azpimarratu du Korsikak eta Euskadik hizkuntza-aniztasunarekiko errespetua partekatzen dutela eta hizkuntza-aniztasuna aktibo handitzat hartzen dutela.
Era berean, Lehendakariak aurreratu du Eusko Jaurlaritza eta Korsikako Kolektibitatea lanean ari direla dagoeneko hizkuntza-normalkuntzako prozesuari buruzko esperientziak eta informazioa trukatzeko protokolo bat egiteko. Lehendakariak azaldu duenez, lau dira lan-eremuak: legeria, hizkuntza biziberritzeko prozesua, hezkuntza eta hizkuntza-ereduen esperientzia; eta konpromiso publikoa eta pribatua.
Gilles Simeoni presidenteak, bere aldetik, korsikera koofizializatzea bere gobernuarentzat helburu nagusia dela adierazi du. Simeoni presidenteak azaldu du lanean jarraituko dutela erakundeek hizkuntza babesteko ezinbestekoak diren politika publikoak babesteko. Erronka oso garrantzitsua da gizarte guztientzat, eta, bereziki, gurea bezalako herri txiki batentzat.
SAVAGHJU-VIVARIU HIZKUNTZA-MURGILKETARAKO ZENTROA
Korsikako Kolektibitateak hizkuntza-garapeneko politika bat gauzatzen du, benetako elebitasuna lortzea helburu duena, eta, bereziki, Korsikako akademiako ikasle guztientzat elebitasuna baldintza berdinetan ezartzeko hezkuntza-estrategia eta gazte korsikarrek beren hizkuntzaz benetan jabetzea helburu duena.
Ikuspegi horretatik, hizkuntzalarien ustez, hizkuntza-murgilketa metodoa da ikasteko tresnarik eraginkorrena. Testuinguru horretan, Korsikako Kolektibitateak aktiboki lagundu du elkarteek kudeatutako hizkuntza-murgilketarako lau zentro sortzen, eta finantziazioaren zatirik handiena ematen du.
Lurralde mailan, hizkuntza-murgilketako lau zentro daude: Savaghju-Vivariu, Bastia-Campanari, Loretu di Casinca eta Bastelica. Hizkuntza-murgilketarako zentroetan eskolak ematen dira, egunero edo egonaldi laburretarako, edo eskola-aldian astebeteko egonaldietarako. Egonaldi horiek Korsikako hizkuntzaren erabilera naturala sustatzen dute eskolako jardueretan, jarduera artistikoetan, kirol-jardueretan edo ingurumena aztertzeko jardueretan.
Savaghju-Vivariu zentroak lurralde-bokazioa du, eta bi klase har ditzake aldi berean, haurtzaindegitik CM2ra, asteko egonaldietarako. Berritu eta egunean jarri da, eta 52 plaza ditu. Irakasle taldea Korsikako hizkuntza eta kulturan titulatutako bi irakaslek osatzen dute, koordinatzaile pedagogiko bat barne. Jarduera nagusiak naturaren (basoaren aurkikuntza, orientazio-jarduerak eta jarduera zientifikoak) eta ondarearen inguruan antolatzen dira, batez ere Korsikako Museoaren hurbiltasunari esker.
