Urdaibai Bird Center-ek, Aranzadi Zientzia Elkarteak kudeatzen duen Urdaibaiko Biosferaren Erreserbako hegaztien ikerketa eta dibulgazio zientifikorako zentroak, 482.000 euroko dirulaguntza jasoko du Europako funtsetik biodibertsitatearen kontserbazioa sustatuko duten jarduketetarako.
Proiektuaren helburu nagusia da biodibertsitate-tasak handitzea padurako habitatak eta horietako espezieak hobetuz, klima-aldaketaren eraginak arintzeko, beste hainbat ingurumen-alderdiren artean. Jarduketak 2021-2023rako estatu-mailako Berreskuratze, Eraldaketa eta Erresilientzia Planean sartuta daude, bertan baitaude jasota lehorreko eta itsasoko biodibertsitatea kontserbatzeko, ekosistemak eta azpiegitura berdea leheneratzeko eta baso-kudeaketa jasangarrirako inbertsioak.
Azken hamar urteotan, Urdaibai Bird Center-etik padurako eta inguruko hegazti-populazioen jarraipena egin da, eta ondorioa izan da padurak kudeaketa ekologikoaren arloko hainbat neurri behar dituela. Urdaibai Bird Center-ek azken 20 urteotan metatu duen ezagutzari esker, behar bezala identifikatu ahal izan da Gautegiz-Arteagako paduretako arazo ekologikoa. Hautemandako arazo guztien artetik, jarduketa bideragarrien bitartez, bai ikuspegi teknikotik bai ikuspegi ekonomikotik, arindu daitezkeenak edo ezeztatu daitezkeenak aukeratu dira, eremuko biodibertsitatearen kontserbazio-egoeran eragin positibo argia izan dezaten.
Kontserbazioko eta leheneratzeko jarduketak bost arlotan banatzen dira: Lehenengoa Gautegiz-Arteagako paduretako urmaelak leheneratzeko eta horien kontserbazio-egoera hobetzeko da. Jarduketarik aipagarrienen artean daude: marearteko ur-fluxuaren bi uhate konpontzea, arrainak eta ornogabeak sartuko direla bermatzeko (funtsezkoak dira hainbat espezieren eta, horien artean, hegaztien elikadurarako), eta marearteko urmaeleko habitatak leheneratzea landare-espezie exotiko inbaditzaileak kenduz eta uhartetxo artifizialak sortuz (hegaztien atsedenerako, elikatzeko eta ugalketarako lekuak dira).
Bigarren jarduketa-arloan zehazten dira hegaztien migraziorako eta negu-pasarako garrantzi handiko eremu bat sortzea Gautegiz-Arteagako Anbekoko polderra leheneratuz. Helburua da hegazti batzuk, besteak beste, mokozabal arrunta, ugaltzeko habitat naturalak leheneratzea eta beste hegazti batzuentzat ugaltze-kolonia artifizialak sortzea.
Hirugarren jarduketa-arloa interesa duten espezieen populazioen habitatak hobetzeko da, horien artean arrano arrantzalearena eta oso mehatxatuta dagoen bisoi europarrarena edo apoarmatu istilzalearena.
Laugarren jarduketa-arloak lursailak erosteko edo alokatzeko ekintzak biltzen ditu biodibertsitaterako eremu sentikorretan edo indargetze-eremuetan haiek zaintzeko.
Azkenik, dirulaguntzarekin Gautegiz-Arteagako paduretako hondakinak ere erretiratuko dira. Jaso eta erretiratu egingo dira naturan nahiz bisualki duten eragina minimizatzeko.
Biosferaren Erreserben kontserbazio-eginkizuna
Kontserbazioaren helburua lurralde bateko baliabide genetikoak, espezieak, ekosistemak eta paisaiak babestea da. Urdaibaiko Biosferaren erreserbak sustatzen du natura kontserbatzea eta naturaren erabilera jasangarria uztartzea, eta halaxe dago jasota UNESCOren Gizakiari eta Biosferari buruzko Programan.
