-
- Gerrak eta egoera ekonomikoak eragindako aparteko neurriek 2022rako aurrekontuan jasotakoa adina dira, eta, guztira, 15 milioi euro inguru dira
Gobernu Kontseiluak Gizarte Ekonomiako enpresei zuzendutako laguntza-sorta bat onartu du gaur. Horien artean, bost milioi euroko deialdia nabarmendu behar da, Ukrainako gerraren eta Errusiari ezarritako zehapenen ondorioz galerak izan dituzten enpresentzat. Gainera, dirulaguntzak daude bazkideak sartzeko, elkarte-egiturak sendotzeko eta langileek enpresan parte hartzeko.
Idoia Mendia lehendakariorde eta Lan eta Enpleguko sailburuak proposatuta, bost milioi euroko aparteko laguntza-sorta bat berretsi da, Ukrainako gerraren eta Errusiari ezarritako zehapen ekonomikoen ondorioz galera ekonomikoak jasan dituzten gizarte-ekonomiako enpresei zuzendua. Laguntzak gertakari hauek finantzatzeko izango dira:
-
- Ukrainako edo Errusiari ezarritako zehapenek eragindako herrialdeetako bezeroekin edo enpresekin kobratu ezin diren fakturak, baldin eta horien kredituak aseguratuta ez badaude.
-
- Ukrainan edo eraginpeko herrialdeetan lan egiten duten enpresako langileen eta haien filialen zuzeneko kostuak, Errusiari ezarritako zehapenak direla-eta, baldin eta aseguru-entitateek edo aseguru-mutualitateek aseguratuta edo babestuta ez badute kontingentzia.
-
- Enpresaren aktiboan dauden material- edo produktu-eskaerak, Ukrainara edo zehapenek eragindako herrialdeetara esportatu ezin direnak eta berrerabilgarriak izateko aukerarik ez dutenak.
-
- ibilgetuaren galera kontabilitate-balio garbiaren arabera, galera aseguratuta ez badago.
-
- gerrarekin zuzenean lotutako lehengaien kostuaren igoera eta ondorengo zehapenak.
Diruz lagundu daitezkeen egitateen kontabilitate-oharrak 2022ko otsailaren 1etik aurrera islatu beharko dira, eta urriaren 31 baino lehen amaitu beharko dira.
Ezohiko laguntzei buruzko agindu hori, batetik, Gobernu Kontseiluaren joan den apirilaren 12ko erabakiak (Ukrainako gerraren ondorio ekonomiko eta sozialei buruzko aurrekontu-neurriak hartzeko agindua jasotzen zuen) eta, bestetik, Eusko Legebiltzarraren apirilaren 8ko osoko bilkura monografikoan hartutako ebazpenak zehazten dute.
Era berean, beste hiru laguntza-sorta onartu dira. Batetik, gizarte-ekonomiako enpresetan —batez ere, lan elkartuko kooperatibetan eta lan-sozietateetan— bazkide langile izatera pasatzen diren pertsonak sartzeko helburua dutenak. 500.000 euro ditu, eta lau kolektiborentzat da: langabetuentzat, gizarte-ekonomiako enpresa batean bazkide langile diren eta besteren konturako lan-kontratua duten bazkide ez diren langileentzat; desgaitasuna duten pertsonentzat; eta gizarte-ekonomiako sozietateetan bazkide gisa sartzen diren nekazaritza-, abeltzaintza- eta basogintza-ustiategien eta ustiategi mistoen titularrentzat.
Deialdietako beste batek 685.800 euro ditu Euskal Autonomia Erkidegoko gizarte-ekonomiako enpresen eta entitateen elkarte-egiturak finkatzeko, baldin eta, nortasun juridiko propioa izanik, haien interes amankomunak ordezkatzeko eta defendatzeko: lan-sozietateak eta lan elkartuko kooperatibak; lan elkartukoak ez diren kooperatibak, izaera konfederaleko elkarteak eta gizarte-ekonomiako entitateen integrazio-erakundeak; ekonomia solidarioko elkarteak eta enplegu-zentro berezietako elkarteak; eta Gutxienez bi urteko antzinatasuna duten langile autonomoen sektorearteko erakundeak.
Azkenik, 140.000 euroko deialdi bat onartu da, langileek Gizarte Ekonomiako enpresen kudeaketan eta organoetan parte hartzea erraztu eta hobetuko duten tresnen garapena eta ezarpena finantzatzeko. Gizarte Ekonomiakoak ez diren enpresen kasuan, laguntzak langileek parte hartzeko plan bat egitea eta ezartzea finantzatzeko, langileek enpresan parte hartzeko ereduak definitzeko tresnak diseinatzeko eta enpresa partaidetuen eredua zabaltzeko erabiliko dira.
Lau deialdi horiekin, Gizarte Ekonomiarako laguntzen paketea osatzen jarraitzen da. Aurten, hasieran aurreikusitako zenbatekoa (7,65 milioi) ia bikoiztu da, eta, 2021arekin alderatuta, jada % 29ko hazkundea bazuena. Gerraren eta egoera ekonomikoaren ondorioz abian jarritako ezohiko neurriek 2022rako aurrekontuan jasotakoa adina osatzen dute ia, guztira 15 milioi euro ingurura iritsi arte. Jaurlaritzak Euskadiko Gizarte Ekonomiari gehien laguntzen dion unea da. Eta oraindik falta dira ekintzaile izateko laguntzak eta lankidetza-laguntzak, laster onartuko direnak.
