Ricardo Ituarte Larrialdiei Aurre Egiteko eta Meteorologiako zuzendariak Babes Zibilaren Kontseilu Nazionalak gaur Madrilen egin duen bileran parte hartu du. Bertan Horizonte 2035 Hondamendi Arriskua Murrizteko Plan berria garatzearen aldeko Jaurlaritzaren babesa adierazi du, baina beti eskumen-esparrua errespetatzetik abiatuta. Bestalde, Ituartek adierazi du Jaurlaritza plana idazteko eta etorkizuneko erronka berriei eman beharreko erantzun eta estrategiarik egokienak diseinatzeko ardura duen batzordean aktiboki parte hartzeko prest dagoela.
Horizonte 2035 Hondamendi Arriskua Murrizteko Planaren helburua da babes zibilaren arloko ekintzetan inplikatuta dauden Estatuko Administrazio Orokorreko organoen, bai organo operatibo zentralen bai autonomia-erkidegoetakoen eta hiri autonomoetakoen, estrategia indartzea, aurrea hartzeko, erantzuteko, ebaluazioa egiteko eta suspertzeko gaitasuna optimizatu ahal izateko.
Fernando Grande-Marlaska Barne-ministroa buru dela egin den bileran Estatu osoko babes zibilaren arloko arduradunek parte hartu dute, eta Ricardo Ituartek gogoratu du Euskadik urte asko daramatzala gai horretan lanean Larrialdiei Aurre Egiteko Euskal Sistemaren bitartez.
Horrela, Polizia eta Larrialdietako Euskal Akademiak egiten duen jarduera balioetsi du, formakuntza ematen dien aldetik larrialdietako eta babes zibileko zerbitzuetako kideei, boluntarioak eta Suteen prebentzio eta itzalketako eta salbamenduko zerbitzuetako kideak barne direla, eta, azkenik, indarrean dauden 60 taktika operatiboak eta Euskadin orain arte ezarri diren larrialdietako eta autobabeseko planak nabarmendu ditu.
Babes Zibilaren Kontseilu Nazionalaren bileraren aurretik, bertaratuek txakurrekin egindako kolapsatutako egituretako erreskate-ariketa bat ikusi ahal izan dute, eta ariketa horretan Ertzaintzako, Esquadra Mossoetako, Guardia Zibileko eta Polizia Nazionaleko agenteek parte hartu dute.
