Beatriz Artolazabal sailburuak zuzenduta, Eusko Jaurlaritzako Berdintasun, Justizia eta Gizarte Politiketako Sailak sustatutako programek lortu dute 2020ko konfinamendutik babesleku sozialetan artatzen ari diren etxerik gabeko 586 pertsonetatik gehienak kalera ez itzultzea.
Hain zuzen ere, agintariek birusaren aurrerapena geldiarazteko ezarritako murrizketa soziosanitarioen ondorioz, Eusko Jaurlaritzak Inor Atzean Utzi Gabe funtsa bultzatu zuen orduan. Funts horrek hainbat programa espezifiko zituen, besteak beste, Lehen Urratsa. Ekimen horrek babesa eman zien konfinamenduan kalean lo egiten zuten pertsonei, eta haiekin lan egiteko aukera eman zuen; era berean, haien bizi-kalitatea hobetu zuen eta gizarteratzeko prozesua bultzatu zuen, ibilbide pertsonalizatu baten bidez.
18 hilabete igaro ondoren, eta Lehen Urratsa amaitu ondoren, hasitako lanari jarraipena eman nahi izan zitzaion, beste erakunde batzuekin hitzarmenak sinatuz, hala nola, udalekin. Gaur egun, 353 pertsona artatzen dituzte tokian tokiko gizarte-baliabideek.
Azken erabakia joan den asteartean egindako Gobernu Kontseiluan onartu zen eta Donostiako Udala zuen titularra; aurretik, Bilborekin sinatu zen eta Getxo eta Barakaldorekin hitzarmenak ixteko lanean ari dira.
“Pertsona horiei arreta ematen jarraitu nahi dugu”, aitortu du Marian Olabarrieta Gizarte Zerbitzuetako zuzendariak. “Dagoeneko egin dugun bidea eta egin dugun lana aprobetxatu behar dugu, pertsona horien bilakaera; eta ezin dugu inolaz ere kalera itzultzea onartu”, adierazi du Olabarrietak.
Gizarte Zerbitzuen zuzendariak ere nabarmendu nahi izan du “erakundeen arteko eta hirugarren sektorearekiko lankidetza bikaina”. “Nolabait esatearren, pandemiak zerbait ona ekarri badigu, erakundeen arteko lankidetza-formula berriak aztertzera behartu gaituela da”, azpimarratu du Olabarrietak.
Irauli eta Trapezistak
Lehen Urratsetik aurrera eboluzionatu duten beste programa batzuk kalean bizi diren familia edo gizarte sarerik gabeko gazteekin lotutakoak izan dira. Pandemiaren hasieran, ehun neska-mutil baino gehiagorekin lan egin zen, eta, horri esker, frogatu ahal izan zen “akonpainamendua eskainiz, kaletik ez ezik, bazterketa-arriskutik ere urruntzen direla”, adierazi zuen Artolazabal sailburuak duela aste batzuk.
Lehen urrats haietatik gaur egun bi programetara iritsi dira: Irauli eta Trapezistak. Bien artean 233 gazterekin ari dira lanean, eta, Artolazabal sailburuaren taldearen aurreikuspenen arabera, datozen hilabeteetan 300 pertsona izatera irits liteke. Horretan ari dira lanean Agintzari eta Peñascal Kooperatiba, besteak beste, eta horiek integraziorako, akonpainamendurako eta prestakuntzarako banakako ibilbidea eskaintzen diete neska eta mutil horiei.
Irauli Lehen Urratsaren hurrengo pausoa da, eta Trapezistaren aurrekoa. Gobernu Kontseiluak, joan den asteartean, 1,5 milioi euroko zuzeneko diru-laguntza onartu zuen Peñascal Kooperatibarentzat, Euskadin familia-sostengurako sarerik ez duten 118 gazte gizarteratzeko eta helduaroan bizitzeko prozesua bultzatzen jarraitzeko. Trapezistekin integraziorako eta heldutasunerako beste urrats bat egin da. Horrekin batera, prestakuntzarako eta laneko aholkularitzarako laguntza iritsiko da. Programak 115 gazte protagonista ditu, Euskadin etorkizuna lantzen saiatzen direnak.
