BAI Sarea osatzen duten enpresa eta erakundeek bederatzigarren batzarra egin dute gaur goizean Gurutze Gorriaren egoitzan, Gasteizen. Batzar horretan, sarea 2018ko martxoan sortu zenetik elkarlanean eta partaidetzan egindako lanaren emaitzak aurkeztu dituzte. BAI Sarea 70 erakundek osatzen dute, eta erakunde horiek Emakundek ematen duen Berdintasunerako Laguntzaileen bereizgarria dute, eta lankidetza-gune bat izatea dute helburu, erakundeen berdintasun-planek lan-merkatuko genero-arrakalak murrizteko duten eragina biderkatzeko.
Emakundeko zuzendariak, Miren Elgarrestak, enpresei azaldu die BAI Sarea ilusioz beteriko proiektua dela eta Emakundeko zuzendari gisa dituen helburuen artean enpresekiko harremana sendotu eta estutzeko asmoa duela. “Gizartea eraldatzeko oso eragile garrantzitsuak zarete eta berdintasunaren arloan egiten duzuen lana ez da zuen enpresetan bakarrik geratzen, gizarteari zuzenean eragiten dio, horregatik zarete eragile estrategikoak”, esan die.
Elgarrestaren hitzetan, “zeharkako eta ordezkagarriagoak diren kudeaketa-eredu berrien aldeko apustua egin duzue, eta eredu bihurtu zarete beste enpresa eta erakunde batzuentzat”. Eredu berri honek “langileen gogobetetasuna handitzen laguntzen du, baita talentua irabazten eta kontziliazio erantzukidea lortzen, ondorioz, produktibitatea eta kalitatea hobetzen laguntzen du”, esan du. Bere ustez, ezinbestekoa da berdintasunaren garapena gizartean aurrera egiteko beharrezko balio gisa sustatzea.
Batzarrean material batzuk aurkeztu dira, enpresen arteko elkarlanaren emaitza direnak, baita datorren ikasturterako ekintza plana ere. Era berean, hiru enpresa saritu dira: Construcciones Mariezcurrena-Zubieder, Gurutze Gorria eta Goiztiri.
Mariezcurrena-Zubieder saritu dute obren prozesuan Lasarten puntu beltz bat kentzeagatik; Arabako Gurutze Gorria, oinarrizko premiak zuzen banatzeko eta hilerokoak izateak desberdintasun gehiago ez sortzeko aurrekontu-partida bat sartzeagatik erabiltzaileen eta/edo nazioarteko babesa eskatzen dutenen arreta-programaren barruan; eta Goiztiri elkartea, harrera-prozesuan berdintasunaz sentsibilizatzeko pilulak sartzeagatik.
BAI SAREAren barruan hainbat lantalde sortu dira. Une honetan, 6 talde aktibo daude, eta 32 erakundek hartzen dute parte. Erakundeen % 46k talde batean parte hartzen du: talde eragilea, komunikazio-taldea, eragile-taldeak, ordainsari-berdintasuneko taldea eta batzorde antolatzailea.
2016an sortzen hasi zen enpresa-sareak beste erakunde batzuekin esperientziak partekatzea du helburu, baita berdintasunaren aldeko politikak erakundeak indartuta atera daitezen eta gure gizartean eragin handiagoa izan dezaten laguntzea ere. Berdintasunaren aldeko planek eta ekintzek enpresetan duten eragina biderkatu nahi du.
Erakundeek honako konpromiso hauek hartu dituzte: berdintasuna sustatzea erakundearen zuzendaritzatik; emakumeak eta gizonak berdintasunez tratatzea lanean, giza eskubideak eta diskriminaziorik eza errespetatzea eta defendatzea; langile guztien osasuna, segurtasuna eta ongizatea zaintzea; emakumeen garapen profesionala sustatzea; berdintasunaren aldeko enpresa-garapeneko, erosketako eta marketineko praktikak egitea; berdintasuna sustatzea gizarte- eta lan-ingurunean; eta emakumeen eta gizonen berdintasunaren alde egindako aurrerapenak ebaluatzea eta zabaltzea.
